Miles di famia kolombiano ta sigui biba den e duda di kiko a pasa ku nan sernan kerí. E buskeda ta sigui relashoná ku desaparishon di 200.000 persona den e pais.
BOGOTA (AFP).- E tribunal di pas di Colombia ayera a archivá un investigashon riba e bèrdat di un informe di Nashonnan Uní, segun ku a haña 20.000 kurpa desaparesé den un aeropuerto di Bogotá. A yega na konklushon ku no tin prueba ku ta respaldá e vershon.
Komité di Nashonnan Uní kontra Desaparishon Forsa den luna di desèmber último a bisa ku “míles di kadaver” ta den “santananan òf depósitonan mal atministrá dje pais”, manera ta e kaso den un hangar di aeropuerto dje kapital kolombiano.
“Jurisdicción Especial para la Paz” (JEP), ku ta investigá e krímennan pió dje konflikto arma kolombiano, a inspektá 47 hangar dje aeropuerto El Dorado di Bogotá i “a konkluí ku no ta eksistí ningun prueba pa sostené e denunsia”.
“No tin ningun prueba ku ta permití pa konkluí ku e hangarnan, bodeganan, zonanan di resiklahe, áreanan di tratamentu di awa òf zonanan fúnebre dje aeropuerto a keda usá komo sitio pa depositá kurpanan”, segun a keda trese dilanti.’
E tribunal tambe a konsultá failnan i dokumentonan di outoridat forense, tambe Prokuraduria General di e pais i “Unidad de Búsqueda de Personas”, pero tur a deskartá di forma kategóriko e hipótesis di Nashonnan Uní.
E gobièrnu dje presidente iskierdista Gustavo Petro a rechasá di forma kategóriko e deklarashonnan dje organisashon i a presentá un nota di protesta.
Pero Ofisina di Nashonnan Uní mas despues a defendé su mes i a sigurá ku el a basa su mes riba “fuentenan di gobièrnu” di Colombia promé ku a saka nan informe.
Colombia ta biba un guera interno di mas ku mei siglo, den kua a enfrentá otro agentenan estatal, guerianan, paramilitarnan i kartelnan di droga, ku un saldo di mas o ménos 200.000 kaso di hende ku a keda pèrdí den e guera akí.
