CARTAGENA, COLOMBIA, AFP. E presidente di Colombia, Ivan Duque a partisipá na un seremonia na Cartagena, kaminda a reanudá buelonan internashonal komersial den e pais, despues di kasi seis luna di interupshon kousá pa e pandemia.
E dos promé rutanan prinsipal ta konektá e pais ku Merka i próksimamente lo kuminsá risibí biahenan di Brasil, Bolivia, Guatemala, Ecuador, República Dominicana i México.
Djaluna lo inisiá tur buelo komersial na Bogotá tambe.
Colombia a detektá su promé kaso di COVID-19 proveniente di Italia riba 6 di mart i a sera su frontera aéreo 17 dia despues.
E pandemia a laga mas di 24.000 moro i 750.000 infekshon desde e temporada aki den e nashon di 50 mion habitante.
Colombia a drenta den un ‘lockdown’ estrikto riba 25 di mart, pero e deterioro ekonómiko a pone ku gobièrnu a suavisá algun medida di ‘lockdown’.
E ‘lockdown’ a kaba riba 1e di sèptèmber. Gobièrnu a opta pa un strategia mas fleksibel kaminda ta pidi tur siudadano pa usa masker den espasionan será.
