BOGOTA, COLOMBIA, AP.- E hefe di ekipo negoshadó di gobièrnu kolombiano den e proseso di pas ku FARC a elogiá e delegado di gobièrnu di Merka, kual su ròl a wòrdu kuestioná pa eks presidente Alvaro Uribe.
“Mi kier probechá di e oportunidat aki pa resaltá e papel ekstraordinario ku e delegado Bernard Aronson di presidente Barack Obama a hunga den e proseso di pas”, asina Humberto de la Calle a bisa na La Habana, sede di e negosiashonnan.
Durante su diálogo ku prensa, De La Calle a pone énfasis pa “gradisí Bernie su dedikashon, su transparensia i mas ku tur kos pa su transparensia den e kòmbersashonnan largu ku a keda tené entre e delegashonnan pa fasilitá e avanse den proseso. El a kombertí den un pilar di e proseso”.
Djamars, Uribe, un kritiko duru di e proseso di pas i di e gobièrnu di presidente Juan Manuel Santos a publiká un komunikado kaminda a puntra “ki interes komersial señor Aronson tabatin den kompanianan ku a resultá konseshonario pa optené rekurso natural na Colombia den zonanan ku a bira dominio di FARC òf vinkulá ku e industria di kòfi ku sosionan yegá na presidente di e repúblika”.
Den febrüari na aña 2015, Obama a designá Aronson komo su delegado den e proseso di pas ku e gobièrnu di Santos i FARC ta hibando den e kapital kubano desde fin di 2012 pa purba pone fin na mas di 50 aña di hostilidat entre e partinan.
Den e mesun intervenshon De La Calle a anunsiá ku próksimamente e delegadonan di FARC na Cuba mester biaha pa Colombia pa splika e miembronan di gueria e kontenido di e akuerdonan lográ te ainda i su transishon di bida sivil.
