BOGOTA, COLOMBIA, AP.- Gobièrnu kolombiano a konsiderá entrada di por lo ménos 30.000 venezolano djaluna. E dia tabata unu positivo i e venezolano a drenta via frontera di Cucuta pa kumpra kuminda i remedi.
“Mi ta kere ku pa e venezolanonan esaki tabata algu positivo i pa Colombia tambe. Mi ta kere ku e nivel di komersio na Cucuta mester a bai hopi bon djadumingu. Pero mas ku tur kos nos kier a kolaborá i apoyá e venezolanonan ku kier a drenta teritorio kolombiano i hasi nan kompranan”, asina e kansier Maria Angela Holguin a indiká den un rueda di prensa.
Míles di venezolano a krusa djadumingu despues ku outoridatnan di Venezuela a permití e paso peatonal di forma temporal pa Cucuta despues di kasi un aña ku esaki a keda será pa òrdu di e presidente Nicolás Maduro.
E kansier a risibí e pregunta di, kon e gobièrnu kolombiano ta manehá seguridat na frontera i kiko lo pasa si un persona keda den teritorio kolombiano. E kansier a bisa ku “tin dianan kaminda outoridat migratorio ta traha pa mira ku tur esnan ku ta krusa mester tin nan papelnan i sino nan ta keda ekspulsá di e pais”.
