WASHINGTON, AP. – Colombia a sigurá djaweps ku e rechaso sorpresivo ekspresá pa kolombianonan di e akuerdo di pas entre presidente Juan Manuel Santos i FARC no ta impaktá su ekonomia.
‘E final di e proseso di pas ta bai tuma mas tempu pero e ekonomia kolombiano i e maneho ekonómiko lo sigui eksaktamente meskos’.
Asina minister di Finansa Mauricio Cardenas a bisa. ‘Semper por a skucha ku entre e proseso di pas i maneho ekonómiko tin un muraya chines’.
Durante un foro selebrando un reunion semestral entre Fondo Monetario Internashonal i Banko Mundial, Cardenas a indiká ku e merkadonan a ‘rospondé bon’.
Na lugá di gana pa un márgen di dos kontra un, kual a wòrdu anunsiá den enkuestanan, partidarionan di e akuerdo ku Forsa Armá Revolushonario di Colombia a pèrdè pa un márgen di 49,8% kontra 50,2% di esnan ku tabata kontra e akuerdo.
E funshonario a bisa ku e meta prinsipal di su despacho lo sigui ahustá na un realidat nobo kaminda produktonan básiko tin preis abou, i pa e presupuesto pa 2017 ta 1% di e produkto interno bruto di 2016.
Otro siman lo manda Kongreso un proyekto di lei tributario kual el a hustifiká komo nesesario pa kompensá e kaida di entrada pa produktonan petrolero i generá mas trabou.
