WILLEMSTAD.- Ayera tardi Corendon a presentá nan ‘fantrip’ pa bai wak weganan di selekshon di Kòrsou. E propio propietario di Corendon, Atilay Uslu, tabata presente pa asina splika di e diferente paketenan ku lo bai tin pa e tres partidonan di fase di grupo, pa loke ta trata selekshon di Kòrsou.
Kuminsando ku e wega dia 14 di yüni kontra Alemania lo bai tin un total di sinku buelo. Dos di nan lo ta dia 12 di yüni i lo ta na balor di 2699 florin. Un di e buelonan ta sali 6or di mainta i e otro 5:30 di atardi. E dos nan aki ta inkluí buelo, hotèl i transporte for di aeropuerto, i lo bula bèk pa Kòrsou dia 15 di yüni. Banda di e opshonnan aki por ‘book’ pa buelo so i lo ta 1599 florin.
E siguiente opshon ta dia 13 di yüni i tambe ta na balor di 2699 florin. E orarionan di buelo ta meskos ku e promé opshon. Miéntras aki tambe ta inkluí buelo, hotèl i transporte for di aeropuerto. Por ‘book’ pa buelo so aki tambe na balor di 1599 florin.
Miéntras e último opshon pa e wega kontra Alemania, ta na balor di 3499 florin i lo sali 8or di mainta. Aki bo ta bula for di Kòrsou pa Houston for di 11 di yüni, i lo regresá te 17 di yüni. Aki tambe buelo so ta na balor di 1599 florin.
Pa wega dia 20 di yüni kontra Ecuador tin dos opshon, ku ámbos na balor di 2899 florin. E promé ta sali Kòrsou 18 di yüni i regresá 21 di yüni. Buelonan ta 4or di mardugá i 5or di atardi. E otro opshon ta 19 di yüni pa 22 di yüni, kaminda buelonan pa esaki lo ta 6or di mainta i 7or di anochi. Pa e wega akí tambe por ‘book’ buelo so na balor di 1799 florin.
Pa e lastu wega di 25 di yüni kontra Kosta Marfil, tambe lo bai tin dos opshon na balor di 2699 florin. E promé lo ta entre 23 pa 26 di yüni, ku buelonan saliendo Kòrsou dia 23 di yüni pa 6or di mainta i 5or di atardi. Miéntras e otro opshon ta dia 24 pa 27 di yüni. Buelonan pa esaki tambe lo ta 6or di mainta i 5or di atardi.
Meskos ku pa tur otro wega di Kòrsou, aki tambe por ‘book’ buelo so. Pa e partido akí e lo ta 1599 florin.
Na kada siudat lo bai tin tambe un ‘Fan Zone’ pa fanátikonan di Kòrsou. Esaki lo keda planifiká pa FFK i otro partnernan ku respaldo di Corendon.
Mañan entre 11or di mainta pa 4or di atardi na Capital C, Corendon lo kuminsá bende e diferente paketenan aki. Por paga únikamente via ’swipe’ i tambe lo por paga poko poko (35%). Mester paga sobrá seis siman promé ku bula.
Lo mester bini ku pasport miéntras por ‘book’ pa un máksimo di kuater hende. Lo por hasi petishon pa karchi pa wega serka FFK, ku tambe lo ta presente e dia akí.
