WILLEMSTAD – Biaha huntu ku e hungadónan di e ekipo nashonal di futbòl di Kòrsou pa Costa Rica i apoyá Kòrsou durante un wega importante den kuadro di Concacaf Nations League. Corendon ta hasi esaki posibel ku un ‘fantrip’ eksklusivo pa San José. Tin solamente 100 lugá disponibel.
E ekipo nashonal di Kòrsou ta enfrentá Costa Rica djárason 24 di sèptèmber. E partido ta importante den e lucha pa un puesto den e siguiente fase di e Concacaf Nations League 2026/27 i pa kualifikashon pa e Concacaf Gold Cup 2027.
Spesialmente pa e fanátikonan di futbòl di Kòrsou, Corendon, den estrecho koperashon ku Federashon di Fútbol di Kòrsou (FFK), ta organisá un biahe úniko pa San José. E 100 fanátikonan lo biaha den e mesun avion ku e hungadónan i staf di e ekipo nashonal.
“Esaki lo ta hopi mas ku solamente un biahe pa un partido di futbòl,” Atilay Uslu di Corendon ta bisa. “E fanátikonan lo bula huntu ku e selekshon pa Costa Rica i lo por eksperensiá e partido di serka. Kòrsou por konta ku un ola blou entusiasmá den stadion. Na mesun momento, e fanátikonan lo por bishitá un di e paisnan mas bunita i diverso di nos region. Esaki ta hasi e fantrip aki realmente úniko.”
E vuelo ta sali di Kòrsou djárason mainta, 23 di sèptèmber. E partido lo wòrdu hunga un dia despues den Estadio Ricardo Saprissa Aymá na San José. Djabièrnè mainta, 25 di sèptèmber, e grupo lo biaha bèk pa Kòrsou.
E pakete kompletu ta kosta 1.799 florin pa persona. Esaki ta inkluí un vuelo di ida i buelta pa Costa Rica, un anochi inkluyendo desayuno den Hotel Barceló na San José, un entrada pa e wega di futbòl i tur transportashon entre aeropuerto, hotèl i stadion.
E benta ta kuminsá djadumingu 12 di sèptèmber pa 8 or di mainta. E fantrip por wòrdu reservá solamente na e agensia di biahe di Corendon na Scharlooweg 27. Pa motibu di e kantidat limitá di lugá, ta apliká: esun ku bin promé bin, ta bebe awa limpi.
Corendon i futbòl di Kòrsou a bira inseparabel: e organisashon di biahe ta e spònser prinsipal di e federashon nashonal di futbòl. Tambe durante e Mundial na gran kantidat di fanátikonan a biaha ku Corendon pa Merka pa eksperensiá e partidonan di Blue Wave personalmente.
