WASHINGTON, MERKA, AFP.- E Coronavirus nobo posiblemente por wòrdu transmití despues di papia i hala rosea, segun indikashon di un sientífiko merikano djabièrnè, miéntras Kas Blanku ta prepará pa duna rekomendashon tokante uso di masker pa e pueblo.
E transmishon via halamentu di rosea aki por splika e tasa di infekshon haltu ku e vírus tin, responsabel pa e pandemia di COVID-19. Pues esnan infektá sin síntoma ta responsabel pa un gran kantidat di infekshon.
Dòkter Anthony Fauci, direktor di Instituto Nashonal di Enfermedat Kontagioso i konsehero di presidente Donald Trump durante e pandemia, a bisa na e kadena Fox News djabièrnè ku informashonnan ta indiká ku “e vírus por pega berdaderamente asta ora esun infektá simplemente papia, no solamente ora di tosa òf nister”.
Akademianan merikano di siensia a detayá vários resultado sientífiko den un karta pa Kas Blanku djárason, durando vários resultado sientífiko preliminar ku ta indiká ku tin un posibilidat ku e vírus por wòrdu transmití den aire i ora hende hala rosea.
Den un estudio, investigadónan di universidat di Nebraska a haña porshonnan di e kódigo genétiko di e vírus den aire di kamber di pashèntnan aisla. Pero e partinan aki no ta ekivalente na e vírus kompleto. Ademas, investigadónan di Universidat di Hong Kong a opservá ku e uso di masker ta redusí e kantidat di Coronavirus ku pashèntnan por saka.
