Embahada kubano na Costa Rica ku mester sera riba òrdu di gobièrnu kostaricense, despues ku Costa Rica a sera su embahada na La Havana.
SAN JOSE, Costa Rica (AFP).- Costa Rica a sera su embahada na La Habana ayera miéntras ku a ekspulsá diplomátikonan kubano for di nan pais, atvirtiendo ku “mester limpia e hemisferio for di komunistanan”. Costa Rica ta un aliado dje presidente norteamerikano, Donald Trump, kende a multipliká su menasanan di tuma kontròl dje pais.
Presidente kostarisense, Rodrigo Chaves, a bisa na prensa ku for di awor Costa Rica “no ta rekonosé e legitimidat di e régimen komunista di Cuba i esei pa motibu di e maltrato, represhon i e kondishonnan no digno bou di kua nan tin e abitantenan dje bunita isl.”
“Mester limpia e hemisferio di komunistanan. “Nos lo no duna legitimidat na e régimen ku ta oprimí i torturá kasi dies mion di kubano”, segun e mandatario derechista, kende dia 8 di mei lo keda relevá pa su kolega di partido Laura Fernandez.
Riba e pregunta si su desishon ta nifiká kiebro di relashonnan, e presidente a kontestá ku “na e momento aki, Costa Rica i e régimen komunista kubano no tin relashonnan diplomátiko”. Chaves a bisa mas aleu ku si ta nan deseo, La Habana por mantené su personal di konsulado den e pais pa atenshon di alrededor di 10.000 kubano ku ta den e pais, miéntras ku Costa Rica, for di Panamá, lo sirbi su siudadanonan ku ta na Cuba.
Embahada di Costa Rica for di 5 di febrüari no ta konta ku personal diplomátiko na Cuba. “Nos a tuma e desishon pa dal bai ku siere di embahada di Costa Rica na e República di Cuba. “Di mesun manera, nos a solisitá na kansieria di Cuba pa retirá su personal diplomátiko dje embahada den San José, ku eksepshon di funshonarionan konsular”, segun e kansier kostarisense Arnoldo André Tinoco.
