WILLEMSTAD.- Cpost resientemente a firma un akuerdo históriko ku Zonos. Zonos ta un kompania Merikano teknológiko ku ta fasilitá servisio di e-Commerce, inkluso pago di impuesto di importashon i kumplimentu aduanal den e pais di destinashon.
Cpost di e forma aki ta bira e promé kompania postal den Karibe ku a firma un akuerdo ku Zonos pa garantisá kumplimentu ku e Órden Ehekutivo 14324 di Merka. Esaki ta permití reanudashon di servisio postal pa e merkado importante aki.
Despues ku Merka a eliminá e “de minimis” (liberashon di impuesto ku tabata apliká riba tur merkansia te ku un balor di $800.-), esaki kousa un paro di importashon di merkansia den e pais. Cpost a move rápido pa buska un solushon. Ku Zonos komo sosio teknológiko, a bira posibel pa paga tur impuesto relashoná ku servisio postal pa Merka adelantá, ku otro palabra prepagá. Esaki ta un rekerimentu nobo di e kuerpo di Duana Merikano (Customs and Border Protection (CBP)). E aliansa ta duna e seguridat ku e servisio postal pa Merka por kuminsá riba korto término.
E firmamentu di e akuerdo a tuma lugá ayera 9 di sèptèmber 2025 durante e di 28 edishon di e Kongreso Postal Universal organisá pa Union Postal Universal (UPU) i ku ta tumando lugá di 8 te 19 di sèptèmber 2025 na Dubai, Emiratonan Árabe Uní (UAE).
Sr. Jervhes Josephia, CEO di Cpost a bisa:
“Ku e akuerdo aki, Cpost ta pone Kòrsou riba mapa komo un pionero regional den transformashon postal. Nos kompromiso ku inovashon i kontinuidat di servisio ta na promé lugá. Cpost a move rápido pa protehá e interes di nos klientenan i pa mantené Kòrsou den un ròl di liderazgo den Karibe. Firmamentu ku Zonos ta nifiká ku nos ta kla pa kumpli ku e regulashon nobo di Merka. Di e forma aki nos ta sigurá ku nos klientenan por sigui konta ku un servisio di Cpost ku ta konfiabel, rápido i moderno.”.
Banda di e akuerdo aki, tambe ta rekerí pa Cpost firma un akuerdo ku e aerolínea American Airlines ku lo garantisá ku Cpost lo pèrkurá pa paga tur impuesto na CBP ku e meta final pa por reanudá e transportashon postal ku kontenido di balor pa Merka.
E aliansa ku Zonos ta nifiká ku pronto públiko en general, negoshinan lokal i klientenan internashonal di Cpost por reanudá e servisio postal pa Merka. Pronto Cpost lo anunsiá e reanudashon di e servisio aki.
