Fundashon pa Konsumidó a hasi Sondeo “Community Box”
WILLEMSTAD.- Durante hopi aña, sistema di pòst a hunga un ròl fundamental den nos manera di komuniká. Repartishon di karta kas pa kas tabata un servisio esensial i un parti normal di nos bida diario. Sinembargo, ku e desaroyo di teknologia i digitalisashon, e manera ku nos ta komuniká a kambia. Esaki ta motibu ku na Kòrsou, Cpost a introdusí “Community box” den diferente bario pa asina abitantenan por risibí nan pòst.
Debí ku Fundashon pa Konsumidó a risibí un kantidat di reklamo tokante e sistema di buska pòst na un “Community box”, nos a tuma e inisiativa pa hasi un sondeo basá riba e eksperensia di e konsumidó ku ta hasi uzo di e servisio aki. Nos a skohe e sinku barionan kaminda mas habitante tin di bai tuma nan pòst na un “Community box”.
E sinku barionan tabata: Otrobanda, Brievengat, Wishi/Marchena i Kust Batterij. Den kada bario Fundashon pa Konsumidó a hasi e sondeo bou di mas o ménos 100 habitante, kaminda e abitantenan aki a haña e oportunidat di bosiverá nan eksperensia pa ku e sistema di “Community box”.
Ku e sondeo aki, FpK a haña un mihó bista riba e puntonan kaminda tin espasio pa mehorashon.
Fundashon pa Konsumidó a aserka e instansia konserní kual ta Cpost ku e puntonan di atenshon aki. Mester bisa aserka ku e kombersashon aki a kana den bon esfera i Cpost tabata habrí pa skucha. E tim di maneho di Cpost a rekonosé e puntonan i a duna di konosé ku ya nan ta hasiendo e inovashonnan nesesario pa hasi e eksperensia di e abitantenan mas agradabel. Tambe Cpost a sigurá FpK ku por lo pronto nan lo sigui traha riba mas inovashon di manera ku ta hasi e eksperensia di buska pòst aki mas agradabel.
Fundashon pa Konsumidó na su turno a chek i a nota algun kambio pa mehorashon di e servisio aki.
Abitantenan ku ainda tin kualkier keho/preokupashon riba e sistema aki por tuma kontakto libremente ku Fundashon pa Konsumidó i/òf Cpost.
