WILLEMSTAD – Asosashon di Restorant (CRA) a reuni ku Sr. Valpoort i Mongen di Sindikato HORECAF. Tópiko tabata entre otro e situashon di skarsedat Di kokí, en partikular chef-kok/sous-chef i mènedjer/supervisor di restorant, kaminda CRA a sinta ku SOAW pa wak kon por suavisá i aselerá e proseso pa atraé e profeshonalnan aki for di eksterior.
HORECAF a komprondé e situashon i konhuntamente ku CRA lo por wak kon por yega na solushon di esaki, komo tin hopi preshon di e sektor di restorant pa ku esaki. I teniendo na kuenta ku turismo a bira un prioridat na Kòrsou, ta importante pa por garantisá kalidat i kontinuashon di servisio.
Tambe a interkambiá idea kon por alsa, no solamente di parti di doño di trabou pero tambe di parti di HORECAF, e desaroyo di trahadónan den sektor di Horeca, pa por duna mihó servisio, i tambe responsabilidat di e trahadó den e sektor aki.
A palabra ku lo sigui elaborá riba e tópiko aki pa por kuminsá ku kurso i kisas estudio den e ramo aki pa konhuntamente yega na un solushon. Tambe lo hasi esfuerso pa inventarisá e profeshon di chefkok i mènedjer riba merkado lokal pa por konkluí kiko nos mes tin na hende ku por ser kapasitá pa por okupá e puestonan aki.
