BUENOS AIRES, AP.- E eks presidente di Argentina Cristina Fernandez a ninga dilanti di hustisia ku e ta responsabel di asosiashon ilegal ku funshonario i empresarionan grandi kual a paga sumanan mionario na soborno pa athudiká obranan públiko. El a konsiderá su mes un persona ku ta wòrdu persiguí polítikamente.
Fernandez (2007-2015) a presentá un karta den korte ku hues Claudio Bonadio na kargo, kaminda el a akus’é di inventá kousanan den su kontra. E kontenido di e karta a wòrdu publiká pa e senador opositor riba retnan sosial.
E eks gobernante, di 65 aña, i kende te awor no a papia públikamente riba e akusashonnan nobo, a yega na e sede di tribunal meimei di medidanan grandi di seguridat. Akinan el a ninga di kontesta preguntanan, kual el a hasi den tres otro kaso mas kaminda hues a akus’é di diferente kousa mas.
E biaha aki e mandatario a wòrdu akusá den un kaso konsiderá komo e trama di korupshon mas grave di último añanan na Argentina. Te ainda tin 38 persona akusá, 15 detené i 10 ku a arepentí, entre empresario i eks funshonarionan di atministrashonnan di Fernandez i su kasá i antesesor Nestor Kirchner (2003-2007) kende a fayesé.
Segun vershonnan di prensa lokal ku akseso na e kousa, un di e por lo ménos nuebe empresarionan ku a rekonosé dilanti di hues di a paga sobornonan a bisa ku Fernandez tabata sa di detayenan tokante rekoudashon di plaka di forma ilegal.
