WILLEMSTAD.- E demanda pa trabou den sektor turístiko ta simplemente mas grandi ku loke Kòrsou tin di ofresé na kapital humano. Sea ta yena e vakaturanan den e sektor ku hendenan ku trata den un otro sektor i hinka e sektor ei den problema, òf ta trese trahadó for di eksterior pa yena e vakaturanan den sektor turístiko.
Direktor di ofisina di turismo (CTB), Muryad de Bruin a bisa den e podcast ‘3’or ku Gino’ riba plataforma digital di EXTRA, ku CTB huntu CHATA a duna kurso na alrededor di 500 persona kaba pa traha den sektor turístiko. Di e grupo aki riba 80 porshento ta trahando aktualmente. Na su opinion e interes ta kresiendo pa traha den e sektor.
Ta mira tambe mas interes di hende pa lanta un negoshi ku ta duna servisio den e sektor. Tambe CTB tin programanan den skol, pero ta dura algun aña pa e studiantenan kaba nan estudio. E realidat ta sinembargo ku e nesesidat pa trahadó ta krese mas lihé ku loke por ofresé.
Nesesidat pa mas trahadó ta sinembargo agudo. Tui Blue i The Pyramont ta habri otro aña i mester di trahadó kalifiká pa traha. “Naturalmente ke pa nos mes hendenan yena e vakaturanan, pero si no tin sufisiente, mester pensa riba otro modalidatnan manera feksibilisá di forma responsabel pa por trese trahadónan for di eksterior pa duna un man.”
E ta bisa: “Realidat ta ku ta 150 mil persona so ta biba na Kòrsou. Mester wak e kadena kompletu. For di momento ku kuminsá traha un hotèl te na e trahadónan pa traha den e hotèl, servisionan ku tin ku duna na turistanan, mantenshon di propiedat, kuido, personal di benta etc.” Segun De Bruin esaki ta trese otro reto kuné i CTB ta purba pa pone enfoke riba nan tur pareu. Ta hiba kòmbersashon ku e sektor i gobièrnu riba tur e retonan aki pa wak kon por solushoná nan mas lihé posibel.
