CIUDAD DE MEXICO (AFP).- Un narkotrafikante chines señalá komo un dje figuranan di mas grandi ku ta sòru pa fentanilo por yega serka gruponan di droga mehikano i kende ta keda buská na Merka, a wòrdu kapturá na Cuba despues ku algun luna pasá el a hui sali for di Méhiko. Zhi Dong Zhang, konosí tambe komo Brother Wang, ta detené riba e isla miéntras ku outoridatnan mehikano ta spera ku lo konfirmá su deportashon pa Méhiko òf si mester formalisá e solisitut di ekstradishon.
Na La Habana, por lo ménos tres fuente di notisia a indiká na AFP ku e siudadano chines ta riba e isla i ku lo mand’é Méhiko, pero sin a duna fecha ni detayenan dje proseso. Detené na Méhiko den òktober di 2024, Zhi Dong Zhang mester a keda husgá pa ekstradishon riba petishon di outoridatnan norteamerikano. E tabata será den un prizòn den e kapital mehikano, pero algun luna despues un wes konsedé pa e haña ‘huisarest’, for di kua el a hui den luna di yüli.
Un korte norteamerikano di Atlanta den yüli a emití un órden di aresto kontra di su persona pa labamentu di plaka. E persona akí ta keda señalá komo esun ku ta abastesé e kartelnan di Sinaloa i Jalisco Nueva Generacion, organisashonnan ku Washington ta denunsiá komo prinsipal responsabelnan di tráfiko di fentanilo den su teritorio i komo tal den febrüari a deklará nan di ta “organisashonnan terorista estranhero”.
