Situashon na Cuba ta realmente malu i kada dia pasa ta sigui empeorá. Edifisionan den dekadensia serio i hopi vehíkulo for di sirkulashon pa motibu di eskases di kombustibel.
LA HABANA, Cuba (AFP).- E máksimo representantenan di Partido Komunista di Cuba tin planiá pa reuní pa diskutí reformanan ku mester reaktivá ekonomia i esaki meimei di blokeo petrolero imponé pa Merka riba e isla. E komité sentral di PCC a konvoká un reunion ekstraordinario pa analisá proposishonnan ku tin komo meta pa habri mas sektor pa invershonnan privá, atraé mas kapital di kubanonan ku ta biba den eksterior i redusí e tamaño di gobièrnu.
E reformanan, presentá anteriormente pa e presidente Miguel Diaz-Canel, lo por keda aprobá awe pa Asamblea Nashonal, ménos ku un siman despues di e anunsio. Pero, no a keda bon kla si nan lo ta sufisiente pa satisfasé e presidente merikano Donald Trump, kende a pone bon kla di ta buska pa trese un kambio dje régimen i a menshoná e posibilidat di “tuma kontròl” dje isla situá na 90 mia (150 km) di Florida.
Gobièrnu kubano, ku ta hibando kòmbersashon ku Washington, a duna di konosé di ta trahando riba reformashonnan pa aliviá e krísis den e pais, ku diariamente tin ‘blackout’ i tambe ta sufri di eskases di alimento, remedi, kombustibel i awa pa bebe.
