Cuba TV ta mustra presidente Miguel Diaz-Canel durante un konferensia di prensa ayera. El a pone bon kla ku Cuba por reuní ku Trump, pero sin nada di preshon.
LA HABANA, Cuba (AFP).- E presidente kubano, Miguel Diaz-Canel , ayera a duna di konosé ku su pais ta dispuesto na dialogá ku Merka riba kualke tema, pero “sin preshon”, na momento ku Washington ta multipliká su menasanan kontra dje isla. “Cuba ta dispuesto na dialogá ku Merka, òf un diálogo riba kualke tema ku e ke debatí òf dialogá”, pero “sin preshon i “prekondishon”, segun Diaz-Canel den deklarashon hasí den kadena di radio i televishon.
E diálogo ei mester tuma lugá for di “un posishon di igualnan, den un posishon di rèspèt pa nos soberania, pa nos independensia, nos outodeterminashon” i sin metementu den nos asuntunan interno”, el a agregá.
For di despues dje atake di 3 di yanüari na Venezuela, ku kaptura di presidente Nicolas Maduro, e prinsipal aliado di Cuba, i tumamentu di kontròl dje sektor petrolero venezolano, Donald Trump na vários okashon a lansa menasanan kontra di Cuba. Ademas di kòrta e suministro di petrolio venezolano i e plaka di Caracas pa e isla, Trump djaweps a firma un dekreto ku ta kontemplá pa bin ku medida finansiero riba e paisnan ku bende krudo ku La Habana, bou dje argumento ku e isla ta suponé di ta “un menasa eksepshonal” pa su pais.
