HAVANA, CUBA, AFP.- Cuba a deklará un alerta di emergensia den seis provinsia oksidental mirando ku orkan Ian tabata aserkando e isla i fortalesé rápidamente. Florida tambe a kuminsá prepará pa posibel efektonan di Ian.
Outoridatnan di Havana a bisa ku nan ta kla pa evakuá personanan di áreanan mas afektá i tambe organisá suministro di awa di bebe i servisionan médiko.
Sentro Nashonal di Orkan (NHC) a atvertí ku Ian ta birando mas intenso i ku esaki por pasa riba parti wèst di Cuba djaluna anochi i djamars mardugá.
Instituto di meteorologia di Cuba, Insmet, a bisa ku Ian ta avansando ku un velosidat di 22 kilometer pa ora.
Na Florida, siudat di Tampa ta bou di vigilansia di Orkan, i gobernador Ron DeSantis a deklará e estado di emergensia di 67 kondado miéntras ku funshonarionan ta preparando pa e aterisahe pronostiká pa djárason òf djaweps anochi.
Ian “lo trese bientu i áwaseru fuerte, inundashonnan repentino i laman brutu, huntu ku aktividatnan di warwarú na kosta di golfo di Florida”, asina DeSantis a bisa den un konferensia di prensa na Tallahassee djaluna.
