LA HABANA, Cuba (AFP).- E promé 15.000 tòn di aros dje 60.000 ku gobièrnu di China gradualmente lo manda pa Cuba den próksimo simannan, a yega na e haf di La Habana ayera. Bou di embargo di Merka for di 1962 i awor ku un blokeo energétiko, Cuba ta pasando den un krísis ekonómiko profundo ku ademas ta marká pa eskases di kuminda i remedi, komo tambe ‘black-out’ durante di oranan largu.
“Den e espíritu di boluntat polítiko firme pa huntu konstruí e Komunidat di Futuro Kompartí Cuba-China, nos ta risibí ku gratitut profundo e 15.000 tonelada di aros mandá pa e pueblo, partido i gobièrnu di China”, segun e presidente kubano, Miguel Diaz-Canel, a skirbi riba X. E mandatario a bisa mas aleu ku “e karga importante aki ta marka inisio di un donashon di 70.000 tonelada, ku gradualmente lo yega na e isla. E lasonan importante di amistat i kooperashon ku ta uni nos ta keda fortalesé na momentonan krusial”, di akuerdo ku e mandatario.
Di su parti, e embahador chines, Hua Xim, a suprayá ku e 60.000 tòn di aros ta representá “e yuda alimentisio di mas grandi ku e gobièrnu di su pais a entregá na e isla den último añanan”, segun por a mira i skucha na televishon kubano na momento dje akto di entrega.
Di akuerdo ku e ministerio di Komèrsio Eksterior di Cuba, Betsy Diaz, “apesar di e limitashonnan di kombustibel, lo hasi esfuerso máksimo pa garantisá e distribushon”.
China, un dje aliadonan i sosionan komersial prinsipal di Cuba na Asia, djaweps último a denunsiá “abusu di medionan hudisial” despues ku Merka a kulpa e èks presidente kubano, Raúl Castro, pa a tumba dos avioneta den 1966.
