Kubanonan sintá ta warda nan turno pa por yena djùgnan ku awa na un pòmp públiko. E pueblo kubano ta sufriendo ku koriente ku ta kai afó tur dia, eskases di kuminda i gasolin, i awor posibilidat di agreshon norteamerikano.
WASHINGTON (AFP).- Un funshonario kubano ayera a duna di konosé ku e isla komunista ta prepará pa un potensial atake di Merka, pero a insistí ku su pais “no tin disputa” ku Washington. “Nos ehérsito semper ta prepará. I por sierto, e dianan aki e ta prepará p’e posibilidat di un agreshon militar”, segun e vise kansier di Cuba, Carlos Fernandez de Cossio, a deklará na NBC.
“En bèrdat nos ta spera ku esei lo no tuma lugá”, el a agregá. “Cuba no tin ningun disputa ku Merka. Pero sí t’asina ku nos tin e derechi pa protehá nos mes. Nos ta dispuesto na sinta pa negoshá”, segun Fernandez de Cossio.
E entrevista tuma lugá ayera na momento ku ku outoridatnan kubano tabata purba na restablesé e suministro di koriente na e isla despues di un ‘black out’ nashonal mas, ku ta e di dos den ménos ku un siman. E situashon aki ta afektá pa e infrastruktura bieu i e bloke petrolero di Merka.
Den un entrevista grabá promé ku e black-out, Fernandez de Cossio a bisa: “Nos ta aktuando di manera mas proaktivo posibel pa por enfrentá e situashon. “Nos ta spera ku kombustibel lo yega Cuba di un manera pa otro i ku e bòikòt imponé di parti di Merka no dura ni por keda mantené pa semper”.
For di 2024, Cuba a konosé shete black-out nashonal, ku ta kompliká bida di un pais ku ta den un krísis ekonómiko. E presidente merikano, Donald Trump, a menasá di lo tuma medida di belasting ku paisnan ku benta petrolio na Cuba. For di 9 di yanüari, e isla no a importá krudo.
