ALBANY, NEW YORK, MERKA, AP.- E gobernador di New York Andrew Cuomo a regresá Puerto Rico ku mas yudansa miéntras e isla ta sigui ku su labornan di rekonstrukshon despues di e orkan katastrófiko aña pasá.
Cuomo a anunsiá djaweps ku su estado lo manda un otro ekipo di eksperto pa asistí e reparashonnan di e ret eléktriko na Puerto Rico, despues di un blackout ku a afektá e pais e siman aki. E gobernador demókrata lo biaha pa e isla riba 29 di aprel.
Ademas lo tin studiantenan universitario, trahadónan di konstrukshon, representantenan sindikal i vários organisashon di yudansa humanitario ku ta partisipá den esfuersonan di rekuperashon.
Esaki lo ta e terser biahe di Cuomo pa e isla desde ku Maria a asotá esaki den sèptèmber. E estado di New York a manda un tonelada di suministro, alimento i awa fresku, ademas di ekiponan di reparashon, reskate i enfermero.
Cuomo a bisa ku e respuesta federal na e desaster ta “un bèrgwensa total”.