WILLEMSTAD.- Curaçao Airport Partners (CAP N.V.) a risibí resientemente un delegashon di LATAM pa un inspekshon di e aeropuerto. Entre e presentenan tabatin Ruben Freixenet, Direktor di asuntunan di aeropuerto; Dionicio Moctezuma, mènedjer regional i Ignacio Carrion, mènedjer di asuntunan di aeropuerto. E tim a opservá e operashonnan di ‘land- i airside’ i tambe a tené un reunion ku e ekipo di maneho di CAP.
Pa prepará pa e aktividatnan di lansamentu, CAP NV huntu ku CTB a bishitá Lima i Santiago de Chile. Na Lima e ekipo a reuní ku representante di Embahada Hulandes, Henrik Laseur, PROMPeru Cynthia Melgarejo i Lima Airport Alfredo Dulanto.
Na Santiago de Chile, Peggy Croes, SVP Aviation Market Development di CAP NV i Rebecca Marval, direktor di merkadeo di CTB, a tené un reunion produktivo ku e ekipo di planiashon i merkadeo di LATAM. Presente tabata Ruben Freixenet, Ania Osses asuntunan di aeropuerto, Loreto Osses ruta ekonómiko Colombia i Ecuador) i Fernando Casasiempre analista di kampaña korporativo.
Riba 2 di desèmber 2025, LATAM lo lansá dos ruta nobo pa Kòrsou. LIM–CUR lo bira un bentana nobo ku lo amplia e konektividat for di Suramérika, i BOG–CUR lo reforsá e ret kolombiano. E ruta LIM–CUR lo operá direkto tres (3) biaha pa siman. E ruta BOG–CUR lo operá riba un base di temporada, tambe tres (3) biaha pa siman.
Ku e servisio direkto for di Lima pa Kòrsou, e region peruano i Conosur lo haña benefisio di un ruta alternativa i mas fásil. Ademas, e servisio nobo ta duna komunidat lokal di Kòrsou un otro opshon pa eksplorá e maravianan di Suramérika.
