Den 8 aña

WILLEMSTAD.- Segun Myrthe Verhulst, presidente di fundashon Curacao Clean Up, ‘tur hende na Kòrsou ta krea mas o ménos 3 kilo di shushi tur dia.’ Segun Verhulst ‘lamentablemente ta tira parti di e shushi riba kaya, den mondi òf e bientu ta supla e shushi den nos laman.’

Verhulst djaweps último a duna un presentashon ku Curaçao Clean Up durante reunion di komishon sentral di Parlamento di Kòrsou. Den su introdukshon el a bisa ku 8 aña pasá un grupo di hende a bini huntu i disidí pa – en bes di reklamá – limpia henter e isla den un dia.

‘Awe, despues di 8 aña, mas ku 19 mil boluntario a limpia un suma astronómiko di 2.8 mion di kilo di shushi. Meta prinsipal di e fundashon Curacao Clean Up ta: un isla sin “zwerf- of dumpvuil”. Pero tambe pa baha e “trash blindness” riba e isla. Pasó komunidat mester bira mas konsiente ku zwerf- i dumpvuil ta inaseptabel.’ Segun Verhulst tin hopi trabou pa realisá. ‘Pero e fundashon ta señalá un kambio positivo. Poko poko nos tur ta birando mas konsiente.’

Presidente di e Clean Up a bisa komo introdukshon ku meta di e reunion ‘no ta solamente pa trese informashon, pero tambe pa inspirá un i tur pa puntra nan mes: Kiko ami por hasi pa un Kòrsou mas limpi?’

Durante e reunion Curaçao Clean Up a presentá un petishon kua haña kasi 6 mil firma. Ku ta nifiká ku e lucha di Curaçao Clean Up ta keda sostené dor di hopi hende den nos sosiedat.

Durante presentashon virtual  di Curaçao Clean Up direktiva tabata presente. Ku ta konsistí, banda di presidente Myrthe Verhulst,  Maarten Schakel (inisiadó i presidente di e akshon di limpiesa for di kuminsamentu), Hans Pleij, komo sekretario saliente. E ta wòrdu remplasá dor di Sharo Bikker.

Corinne Senior-van Hal tabata presente komo tesorero i Lisandra Martis ku ta aktivo komo miembro di direktiva.

Komo último palabra Verhulst a bisa ku: ‘Mi kier enfatisá ku un isla mas limpi no ta un tarea di gobièrnu òf di e direktiva so, pero ta un tarea di nos tur. Pero nos ta spera ku nos por konta riba e sosten di parlamento i gobièrnu pa sigui yuda nos direktiva pa eduká, fasilitá i          kontrolá. I asina huntu nos por logra nos meta pa un isla limpi i bunita.’

LAGA UN KOMENTARIO

Please enter your comment!
Please enter your name here