WILLEMSTAD.- Curaçao Clean Up ta bai sigui pusha pa logra ku ta publiká e lei kontra uso di plèstik mas pronto ku ta posibel. E lei ta aprobá pa parlamento, pero ainda e ta pegá un kaminda den e mulina di gobièrnu, Sharo Bikker di Curaçao Clean Up ta bisa den e podcast ‘3’or ku Gino’ riba plataforma digital di EXTRA.
E organisashon ta spera ku awor ku tin kontinuashon di e mesun gobièrnu ku tin un konosementu inmediato di kiko e situashon ta. Ta e mesun gobièrnu a tuma akshon aña pasá, sa kiko e dolónan ta i ta mira alabes kiko ta pasando aworakí. E speransa ta tambe ku ta mira ku tin mas kos ku tin ku pasa riba tereno di limpiesa di Kòrsou.
Curaçao Clean Up tin alabes bon kontakto ku funshonarionan di Ministerio di Salubridat, Medio Ambiente i Naturalesa i ta spera ku esaki tambe ta yuda ku ta publiká e lei di plèstik mas pronto posibel. Otro punto ku segun Bikker mester traha hopi riba dje ta komportashon di outomobilistanan. Un di e problemanan grandi ku e kantidat grandi di “zwerfvuil’ kantu di kaminda ta di hendenan den outo ku ta tira sushi for di bentana.
Pensando bèk den tempu Bikker ta bisa ku Kòrsou tabata limpi un tempu. Hendenan tabata tene nan kas, kurá di kas i tambe pafó di nan kurá limpi. “Tur hende tene nan kurá i dilanti nan porta di kurá limpi esaki ya kaba ta yuda hopi.”
Tambe e ta mustra ku ántes tabatin e servisio di SKS ku tabatin komo tarea pa kontrolá komportashon di hende riba kaya i dùmpmentu ilegal den naturalesa. “Tin hopi aña ta papia ku mester aktua, pero awor e tempu a yega. Mester buska un manera ku ta hasi mas na ‘handhaving’ atrobe.”
Curaçao Clean UP a pone kònteiner na diferente sitio pa rekohé bleki, bòter i glas. Tin kompania ta pasa kolektá esakinan i ta resiklá esakinan pasobra por duna plèstik un di dos bida. Tambe tin un kompania na Kòrsou ta eksportá plèstik i karton.
Un idea manera parlamentario Juniel Carolina a lansa, esta introdusí “statiegeld” tambe ta yuda. Pero pa Bikker un kampaña di konsientisashon tambe ta yuda hopi. “No ta kosta nada pa na kas separá plèstik i tira esakinan apart afó.”
Loke Curaçao Clean UP ta boga p’e tambe ta ku negoshinan ta tene rondó di nan edifisio limpi. Asta kompanianan grandi por adoptá sierto áreanan ku nan ta tene limpi ku regularidat. Bikker a menshoná komo ehèmpel rotòndenan ku por mantené limpi.
Curaçao Clean Up mes a kuminsá ku un proyekto piloto pa huntu ku komersio pone bakinan na sentronan di bario pa asina siudadanonan por trese nan bòternan di plèstik, glas i bleki. Muchanan ku trese esakinan ta haña un kuki òf kualke otro rekompensa chikí. Tur esaki pa krea konsientisashon.
