Curd Evertsz huntu ku Cela i David Scott Crocco a presentá e luna aki e proyekto nobo Curaçao Film Score Studios. Un proyekto ku ta hiba Kòrsou su talentonan i su nòmber na un nivel mas haltu ku músika, areglo ku lo subi pantaya grandi di sine. Den nos studio di Djasabra nos tabatin presensia di nan pa a presente e proyekto. Dia 1e di mart e posibilidat a habri pa tur ku ke forma parti di e proyekto aki. Amantenan di sine mundialmente tin nan eksperensia durante momentunan ku ta disfrutá di un sine. E eksperensia ei ta dependé hopi di kalidat di e sine, di su kontenido, di su “storyline”, kalidat di imágennan i zonido di kua efektonan di músika spesial pa sine, i kon tur esaki ta wòrdu editá pa asina logra un bunita produkshon esta Film Score.
Hopi talento na Kòrsou
Curd a splika ku Curaçao Film Score Studios ta un inisiativa kaminda el a pensa pa krea un plataforma den kuadro di Nation Building i yuda konstruí e pais. Tin asina tantu talento, kompositornan, músikonan,m esnan ku ta areglo, toka, arte i kultura i nan ta asina tantu ku ta kana rònt, tin aki i otronan internashonal tambe pero ku no ta keda deskubrí sufisientemente, ku e pasenshi ku nos no tin. Den e kuadro aki a bin ku e idea pa krea un plataforma kaminda ta trese tur músiko, habri un merkado pa nan topa ku otro, pa nan por traha tantu individualmente komo kolektividat i asina traha, skibi komponé i areglá film score. Film Score ta muzik ku ta traha/komponé i ku ta pega bou di un sine. Ora wak un sine ta mira imágen, bos, efekto di zonido pero muzik tambe. E muzik ei segun Curd, por kumpr’é, paga otro hendenan pa e derechi ku nan tin riba dje òf komponé. Aki tin asina tantu talento i p’esei a bin ku e idea pa trese tur huntu i asina konhuntamente ku CTB i ministerio di desaroyo ekonómiko promové Kòrsou pa traha muzik pa sine, tantu den forma di artista individual komo kolektividat. “Nos ta pone e mesa pa tur hende por kome”, tabata e palabranan di Curd. Lo no mishi ku pan di niun hende i p’esei ke trese tur hende huntu i pa e motibu ei a krea e plataforma di Curaçao Film Score Studios. E industria di sine ta buskando konstantemente bon muzik pa pone bou di nan pelíkulanan i aki tin sufisiente potensial pa por ofresé esaki. Ta netamente den e kuadro aki na Kòrsou bibando p tres aña kaba Cela i David Scott Crocco ku ta bin di e industria di muzik na Merka.
Kòrsou ta “the best”
Riba nos pregunta na David dikon Kòrsou el a kontestá “Because it’s the best”. Nan a yega Kòrsou 3 aña pasá pa un fakansi kòrtiku. Nunka nan a konosé Kòrsou promé, pero nan kier a bai un pais den Karibe. Nan a tira bista riba algun isla pero a skohe Kòrsou. David a konta ku nan a bin Kòrsou pa 8 dia pero riba e di 7 dia nan a kumpra un kas i a keda Kòrsou te awe. Kòrsou ta algu mágiko, ta su hendenan, talento i e ta reip awor aki. I asina nan a namorá di e isla. Nan tin un studio rekonosé i nominá pa Emmy na Merka “Audio Post production”. Banda di esaki nan tin un negoshi di Libreria di Músika kaminda nan tin 27 kompositor i nan ta den posishon di laga e muzik yega na e produktornan. I nan ta haña nan ku produktornan ku tin mester di score muzik pa esenanan riba pantaya di sine. Tambe segun David nan tin e habilidat di por yega direktamente serka e hendenan aki i nan a pensa ku esaki lo ta algu ku nan por hasi na Kòrsou ku tin asina tantu talento ku músikonan.
Festival di tumba tabata e “eye opener”
Cela di su parti a bisa ku nunka nan a ni hasi un investigashon di músika di Kòrsou òf algu asina. Nan simplemente tabata buskando un lugá pa nan fakansi. I siendo aki nan nan a kai namorá di Kòrsou i a drenta den su músika. Loke a hala mas nan atenshon i tabata e “eye opening” pa nan tabata nan bishita na festival di tumba. Tantu Cela komo David tabata sa ku tin talento na Kòrsou pero nan no a imaginá nan mes ku ta asina tantu tin pa e grandura di e isla aki.
Kada dia na festival di tumba tabata algu inkreibel. Ta talento tras di talento tabata subi esenario. Huntu ku nan tambe TG Scott, direktor di pelíkula grandi internashonalmente invershonista na Kòrsou ku plannan pa filma Departure na Kòrsou. Otro den e tim di Curaçao Film Score Studios ta Eloise van Wickeren i tambe nos tin di menshoná Henry van der Kwast komo otro lider den e tim.
Un sentro musikal den seri Otrobanda
David a sigui konta ku nan a kumpra un kas den Seru di Otrobanda, den e kaso aki kaminda tabata sede di Demokrat. Nan lo bai drech’é i dun’é su bunitesa bèk i aki lo bira un sentro pa músikonan. Ku esaki David a enfatisá ku nan no a bini aki pa kita e kultura di e isla. I p’esei lo sòru di hasi e edifisio ku nan a kumpra aki un sentro di músika kaminda lo tin muzik konstantemente i lo ta habri pa hendenan lokal. El a konta kon nan a keda aserká pa hendenan ku a konta kon nan a lanta den e sentro aki ta toka. Naturalmente nan lo ta habrí pa turista pero e ta mas pa e hende lokal drenta i kaminda lo tin músika konstantemente.
Un bon kompositor ta un bon kompositor
I no tin niun spesifikashon di muzik ku nan ta rekerí. David a bisa nos ku un bon kompositor simplemente ta un bon kompositor. Akshon ta akshon, drama ta drama. Den e kaso aki ta e kalidat di músiko. Curd Evertsz a reakshoná despues di David bisando ku meskos ku idioma ta evolushoná, meskos músika ta evolushoná. I ku e kompositor i areglistanan ku tin aki, nan por komponé músika folklóriko pero tambe sinfóniko, i por komponé tur kos dependé kiko e industria di sine ke. No ta pa músika karibense pero ta algu amplio. I e músika di tumba a keda usá den sinenan anterior; esei tabata loke Gregory Colina a mustra den su presentashon na lansamentu di e inisiativa aki. Nos músika ta tur kaminda pero nos no ta realisá esaki, Curd a bisa Djasabra. I p’esei e inisiativa di Curaçao Film Score Studios, pa trese e talentonan aki huntu miéntras ku CTB i MEO ta promové nan internashonalmente. Djis imaginá sintá den un sine i na momentu ku e “credits” ta pasa por mira nòmber Kòrsou i su kompositornan.
Reakshon inmenso
Den e kuadro di e inisiativa nan ta organisá 4 seminario, di kual un a pasa kaba, pa interkambio di konosementu. Un hende ku por skibi muzik no ta nifiká ku e por manehá un negoshi i p’esei e seminarionan pa kompartí eksperensia i konosementu ku diferente persona eksperto riba nan tereno entre otro den negoshi lo duna informashon. I for di 1e di mart ora a lansa e inisiativa, e reakshon ta inmenso, segun Curd i David a bisa. Riba e anochi di 1e di mart, despues di tur e presentashonnan, a bai i bin bèk a mustra riba e pantaya grandi 2 minüt di klep pero sin muzik. Despues un banda bou di direkshon di Gregory Colina a bai toka i pasa e muzik ei bou di e klep ku a mustra promé. Di e forma ei por a haña un idea, di un forma real ta kiko i kon e kos mester ta esta krea músika ku ta kuadra ku loke ta mira. E loke ei tabata grandi pa tur presente.
Sin ganashi pa logra ganashi
E inisiativa di Curaçao Film Score Studios ta unu sin lukro di ganashi. Curd a splika ku ta trata di un inisiativa pa krea un merkado kaminda profeshonalnan si por gana for di dje ku nan komposishon i músika. E ta bira un fuente di entrada pasobra ta bai eksportá músika. E inisiativa ta krea e base di kontakto ku e músiko su informashonnan pa asina e músiko por keda kontaktá direktamente. Pa tur hende tin algu, komo Kòrsou por bai komponé i bende e produkto lokal aki riba tereno di pelíkula internashonal pues e ta un produkto ‘made in Curaçao” ku ta wòrdu trahá lokalmente den e merkado pero por wòrdu bendí internashonalmente pa di e forma ei krea divisa pa nos pais ku ta algu di gran importansia.
Siguiente seminario
E promé seminario ya a tuma lugá manera nos a menshoná mas ariba i awor dia 23 di yüni tin e di dos. Pa tur informashon por tuma kontakto na curacao_filmscores@gmail.com. Ku kada un di e seminarionan aki nan ta spesifiká riba sierto tópiko. Entre otro Banko Sentral tambe lo bai duna informashon den un di e seminarionan. Protekshon di e produkto ta haltu serka e inisiadónan. E punto mas importante ta pa haña tur hende huntu i asina huntu ta mas fuerte. David a enfatisá ku e plataforma no ta pa kompositornan i músikonan so pero tambe esnan ku ta traha pelíkula. Tur por siña algu. Nan no ke pa un hende sinti su mes ku bèrgwensa pasobra e ta toka kitara so pasobra e tambe por benefisiá. I músika ta hasi hopi ku e mente i den e kuadro aki e inisiadónan a haña reakshon di un sikiater na Kòrsou ku ke papia i duna un splikashon kiko músika ta hasi ku hende su mente. Ku esaki Curd a enfatisá ku tur hende ke trese algu i kontribuí ku e plataforma pa e logra su metanan. David a splika mas aleu di e influensia di muzik riba e hende, riba e mucha. E mucha ku ta praktiká un ke otro tipo di músika/instrumènt ta bai bon na skol.
Kòrsou no a lubidá kiko ta músika
Loke ku a hala atenshon di David na Kòrsou ta ku aki por tende tur tipo di músika, salsa, soka, etc. i e ta stima esei. Loke e gusta ta ku aki no a lubidá kiko ta músika, e ta alegria, goso, selebrashon. Loke ku David a gusta mas ta ku no a hasi e músika algu asina serio ku ta pèrdè e goso ku e ta trese kuné.
