WILLEMSTAD.-Airopuerto Hato tambe mester a hasi sierto adaptashon na su operashon despues di e situashon ku a surgi na Venezuela. E espasio aéreo di Kòrsou no tabata será, pero ta buelonan pa i for di Merka a kanselá debí ku FAA a tuma e desishon ei pa kompanianan merikano. Manera ta konosí kompanianan di aviashon hulandes manera KLM, Corendon i TUI tambe a disidí pa no realisá nan buelonan ayera.
Bosero di CUR Fayna Haseth a splika ku e operashonnan a reanuda ku eksepshon di Laser, Avior i Global X. Ta spera ku airopuerto ta mas drùk ku normal ya ku ta akomodá algun di e buelonan ku a keda kanselá djasabra 3 di yanüari. Pa e motibu ei ta enkurashá pasaheronan pa nan keda informá nan mes regularmente di e skema di buelonan ya ku esaki por kambia. Usa e website pa hasi esei www.curacao-airport.com/flights
Ta konsehá pasaheronan ku tin un buelo konfirmá pa yega airopuerto na tempu. Tambe ta pidi pasaheronan, di kua nan buelo a keda kanselá dia 3 yanüari, i tambe esnan ku no tin reservashon konfirmá, pa no bai airopuerto pero tuma kontakto direktamente ku e kompania di aviashon pa regla nan biahe. Ta kòrda tur pasahero pa verifiká status di nan buelo ku nan kompania di aviashon promé ku bai airopuerto.
