WILLEMSTAD.- Curaçao Lions Cub a selebrá un logro importante; 80 aña di esfuerso i trabou na komunidat di Kòrsou. For di momentu di su lantamentu 80 aña pasá e klup a dediká su mes inkansabelmente na duna yudansa na esnan ku mas tin mester di esaki.
Loke un biaha a kuminsá ku un mishon kla: sirbi i sostené kaminda ta posibel, awor a bira ochenta aña di kompromiso sosial ku komunidat. Den ehekushon di su aktividatnan, Curaçao Lions Club ta sigui e asina yamá Global Causes di Lions International. E prioridatnan mundial akí ta enfoká, entre otro, riba kombatí hamber, promov’é kuido di wowo, sostené hóbennan, protehá medio ambiente, duna asistensia na momentunan di desaster i lucha kontra kanser di mucha.
Durante e último 80 añanan, e klup a realisá un gran kantidat di proyekto i inisiativa ku tabatin tin un impakto positivo i duradero den sosiedat di Kòrsou. For di akshonnan di ayudo lokal i programa edukativo te na sosten struktural pa gruponan vulnerabel: Lions semper a laga nan mes guia pa nan balor fundamental “We Serve”.
Durante e selebrashon di e hubileo, no tabata solamente reflehá riba e historia riku di e organisashon, sino tambe mira dilanti pa e futuro. Curaçao Lions Club ta ekspresá su gradisimentu pa e konfiansa i sosten di komunidat, partnernan i boluntarionan durante tur e añanan.
Ku orguyo i energia renobá, e klup ta mira dilanti pa e próksimo dékadanan. Lions ta determiná pa sigui komprometé nan mes pa por lo ménos otro 80 aña na benefisio di Kòrsou i su abitantenan.
