WILLEMSTAD.- Durante di e tres dianan di Curaçao North Sea Jazz Festival lo bo por hasi uso di tres diferente sitio di parker den serkania di World Trade Center. Bùsnan lo kore grátis pa hiba bo na i for di e tereno dje festival. Tur sitio di parker lo ta bon iluminá i ku seguridat.
PARKEO, BÙS I TAXI
E terenonan di parker lo ta habrí riba dianan 3, 4 i 5 di sèptèmber for di 5or di atardi. E área di e festival su portanan ta habri pa 6or di atardi. E tres sitionan ofisial di parker di CNSJ 2026 ta: Sambil, Stadion di Ref i e vèlt di futbòl na Veeris.
E terenonan aki lo tin indikashon di ‘Parking’. Ora bo presentá bo karchi di entrada di e festival lo bo risibí akseso na e sitio di parker i e servisio di bùs. Sigui e instrukshon di e personal di seguridat i di bùsnan.
BÙS
Bùsnan lo kore bai bin entre e sitionan di parker i e área dje festival riba e siguiente orarionan: Djaweps, 3 di sèptèmber, di 5or di atardi pa 2or di mardugá. Djabièrnè, 4 di sèptèmber, di 5or di atardi pa 3or di mardugá i djasabra, 5 di sèptèmber, di 5or di atardi pa 3or di mardugá.
Bùsnan lo baha tur hende na e rotònde Beto Adamus, ariba na Helmin Magno Wiels Boulevard. Pa e bishitantenan ku tin problema pa kana lo tin ‘Trolley Train’ ku lo baha i subi e seru. E bùsnan lo regresá e sitionan di parker for di e rotònde.
TRÁFIKO
Den kuadro dje festival lo tuma algun medida di tráfiko, entre otro Helmin Magno Wiels boulevard lo ta será entre Aqualectra Mundu Nobo i e rotònde Beto Adamus na Parasasa riba tur e dianan dje festival entre 5or di atardi te ora e último bishitante a bandoná e área di evento.
No ta rekomendá pa parker den e área rònt di Piscaderaweg, esaki pa evitá ku kayanan ta bira smal i pa por pèrkurá ku servisionan di emergensia por hasi uso dje kaminda sin opstákulo. Polis lo pèrkurá pa kita tur vehíkulo ku ta mal stashoná.
TAXI
E ‘standplaats’ pa Taxi lo ta riba Piscaderaweg na altura di Marriott Beach Resort. Lo tin indikashon ku bòrchi pa identifiká e lugá di parker di Taxi.
KALOR
Durante dje periodo akí di aña ta bastante kalor i bo mester evitá deshidratashon i kalor eksesivo. Ta rekomendá pa kubri bo kabes ku sea un pèchi òf lensu; bebe sufisiente i kome. Evitá e uso di alkohòl. Dado kaso bo ta sinti malu notifiká e tim di seguridat òf EHBO na e sitio.
NO TA PERMITÍ
No ta permití uso di ‘drone’ riba òf rònt dje tereno dje festival. Despues di evaluashon di seguridat no ta permití pa drenta ku stul òf krùk. Riba e tereno dje festival tin diferente tribuna i sitionan pa sinta pa esnan ku tin problema ku pia.
Pa mas informashon por bishitá e wèpsait: https://www.curacaonorthseajazz.com/nl/algemene-info/niet-toegestane-voorwerpen/ i tuma nota di loke no ta ser permití pa drenta e festival kuné.
