Curd Evertsz: Búskeda den un área grandi ta delikado i mester keda bon kordiná

878

WILLEMSTAD.- Aktualmente tin búskeda grandi tumando lugá riba nos isla. Esaki relashoná ku pèrdida di un hòmber turista na Bándabou. Pa por hasi e búskeda aki di un forma efektivo mester plania i kordiná.

EXTRA a hiba kombersashon ku Curd Evertsz,  ku a splika un tiki mas ekstenso kiko realmente ta un búskeda den un área asina grandi i kon esaki ta kana.

Kordinashon

Curd Evertsz a indiká na EXTRA, búskeda den un área grandi p.e mondi, ta enfoká su mes riba kordinashon di un forma sentral for di un punto.

Pa por hasi esaki, ta traha ku diferente organisashon i boluntario. Ora ta harma un búskeda òf reskate, ta duna tur esnan envolví ku e búskeda un ròl i funshon. Un bon union por trese resultado eksitoso maske no ta semper esei ta e kaso. Ora organisá un búskeda, mester tin sufisiente hende pero mester kordiná e búskeda. Kada kaso ta diferente i ta dependé di e kaso, por subi e kantidat di hende nesesario pa un búskeda.

Segun Curd Evertsz, hopi biaha esnan envolví ke aktua lihé pa por yuda mihó posibel pero e kos mester kana bon si.

Informashon ta hopi importante

Ta balioso tambe pa haña mas tantu informashon posibel ku por yuda, asina por harma un bon plan inisial. Mester distinguí kiko ta keda asumí i kiko ta echonan real. Asina so por tene un búskeda efektivo.

Teknologia durante búskeda

Teknologia ta hunga un ròl grandi aktualmente. Durante di kualke búskeda ta hasi uso prinsipalmente di teknologia manera un kámara ku mikrofon, drone, helikòpter etc.

Esakinan tur ta hasi e búskeda efisiente. Alabes despues di búskeda por bai bek i wak e informashonnan kolekta.

Nunka buska pa loko

Riba papel por pone hopi kos. Por bisa ku ta buska 1,2,3 dia etc promé ku yega na e desishon ku ta wanta ku e búskeda. Pero tur kos ta dependé di e informashon ku tin. No tin un nesesidat di kontinuá ku un búskeda si no tin mas informashon òf un kaminda pa buska riba dje

Presupuesto tambe ta hopi importante. Kada organisashon tin nan presupuesto i esaki tambe ta dependé di kuantu por sigui ku un búskeda. Dado kaso suspendé un búskeda pero bini mas informashon, lógiko por sigui ku esaki bek.

Prevenshon!

Kiko ku bo ta bai hasi, semper prevení ta mihó ku kura. Promé ku bo bai hasi kualke kos, buska pa sa kiko ta e kosnan importante ku bo mester tin promé ku bo bai òf drenta kualke área. Un punto importante tambe ta pa tuma konseho di bo dòkter di kas. E sa di bo estado di salu i por konsehá bu.

 

 

LAGA UN KOMENTARIO

Please enter your comment!
Please enter your name here