Entrega ta tuma lugá den 14 dia na lugá di 7 dia
WILLEMSTAD.- Klientenan ku tabata pendiente pa haña nan bòm di gas grandi (100lb) na nan kas por keda trankil. Curgas ta trahando duru pa eliminá e retraso ku a surgi despues ku a kai atras ku entrega di bòmnan di gas, pero e situashon tin atenshon di gerensia di Curgas/Curoil asina EXTRA a komprondé di bosero di e kompania Sabine Curiel.
E siman aki a yega na mesa di redakshon di EXTRA reklamo di klientenan ku a mustra preokupashon pa e echo ku nan a hasi pedida di gas pero e entrega a tarda mas ku normal. Mesora e pensamentu a bini ku kisas esaki tin di haber ku e blackout grandi ku Korsou a sufri algun siman pasá na momentu ku un problema den Curaçao Refinery Utilities a pone ku mashinnan di Aqualectra tambe a stòp di funshoná i asina hinter Korsou a keda hopi ora den sukú.
Den komunikashon ku sra. Curiel di Curoil el a duna di konosé ku relashoná ku e problema ku a surgi ku CRU tabatin un siman di silindernan di gas ku mester a keda entregá ainda. Esaki a pone ku klientenan a ripara ku nan no a haña gas den e 7 dianan ku normalmente ta tuma pa Curgas entrega e silinder, pero e kliente ta haña su gas den 14 dia.
Curgas ta trahando duru pa rekuperá e tempu i asina kumpli ku klientenan.
