Curoil: Suministro jet fuel no ta problema
WILLEMSTAD.- E situashon na Refineria Isla ta normalisando un poko. Awe den oranan di mainta e refineria a kuminsá ku 1 Megawòt na koriente, loke no ta sufisiente pero e ta yuda un poko. Refineria tin mester di alrededor di 6 Mw pa e por operá optimal. E informashon ku EXTRA ta disponé di dje ta mustra ku mester tabatin deliberashonnan entre ehekutivonan di refineria i Curoil debí ku mester kontrolá e kalidat di jet fuel. EXTRA mester indiká ku den kombersashon ku bosero di Curoil el a duna di konosé ku tin sufisiente jet fuel den tankinan di Curoil pues esei no mester ta problema pa e suministro na Hato.
Manera EXTRA a informá for di ayera durante di dia, Isla tin mester di koriente pa por pòmp jet fuel pa aeropuerto i tambe pa manda fuel pa Aqualectra.
EXTRA tin informashon ku entre Aqualectra i Isla tin palabrashon pa subi e suministro di koriente pa asina refineria por yega alrededor di 3 pa 4 Mw ku e sperando di yega e 6 Mw nesesario. Esei lo ta algu positivo pa motibu ku una bes e nivel di koriente subi den e refineria esei ta hasi posibel ku por pone mas ekipo den operashon atrobe. Si logra esaki esei lo nifiká ku pa djaweps trahadónan di ofisina di Refineria Isla lo por bai trabou atrobe. Meskos ta konta pa e suministro di awa di bebe pa edifisionan di Isla.
Un punto hopi positivo ta ku e servisio médiko di Isla si ta den ful operashon. Tur sistemanan di e Poli di Isla ta funshoná bon, pues ta un motibu di trankilidat pa e trahadónan i nan famia.
Biniendo bèk pa e situashon ku ta toka Curoil, sra. Sabine Curiel a informá EXTRA ku Curoil a sera e stashonnan unda ta yena bòm di gas chikitu temporalmente. Esaki ta un medida temporal teniendo kuenta ku e planta den Isla ku ta atendé gas pa kushiná no ta funshoná pa falta di sufisiente koriente. Pa awor aki tur hende ku a kustumbrá di yena nan bòm di gas chikitu mester bai kumpra bòter di gas chikí na rebendedónan ofisial manera pòmp di gasolin Buena Vista, Vanddis i otronan.
Curoil a perkurá pa instansianan manera hospital i prizon si sigui haña gas sin problema, miéntras ta keda vigilá e situashon di suministro di gas pa kushina di manera ku por bai yena e tankinan na e sitionan unda ta yena gas chikitu, pa sirbi esnan ku mester yena nan bòter di gas chikí.
