Na yüni próksimo ta terminá su estudio di medisina i lo ta “Basis arts”. El a bai studia Ulanda 7 aña pasá i awe e ta konta nos su eksperensia ku e bida na Ulanda i ku su estudio.  El a konta nos ku el a bai Radulphus College kaminda el a kaba VWO ku 18 aña. El a duda unda pa bai studia i finalmente a bai Ulanda. Den su promé aña el a biba na Amsterdam i a studia na Vrije Universiteit Amsterdam i a studia Gezondheid en Leven. E no a gusta e estudio mashá ounke el a logra su ‘propedeuse’ si. El a kambia i a bai hasi medisina na Vrije Universidat di Amsterdam mes. E ta masha kontentu di a skohe i ya den su último aña di medisina i ta terminá esaki na yüni awor. For di chikí semper su soño ta pa bira dòkter. Pero ta un diferensia di kiko bo deseo ta pa bira i kon pa logr’é. El a splika ku pa e bira dòkter mester di natuurkunde, biologie, scheikunde, wiskunde, nederlands i engels i puntonan mester ta bon. E no a realisá esei delantá pasobra e ta odia Natuurkunde. Pero e mester a skohe. E ta kòrda den klas 4 di VWO su maestro mes a keda wak si e ta sigur ku e ke skohe e vak ei. Pero su meta ta pa bira dòkter i e mester di natuurkunde. Tambe e tabata na altura ku na Ulanda pa bira dòkter ku tin di pasa dor di un proseso di selekshon i un CV ku hopi trabou boluntario i esei tambe el a traha duru ariba. El a hasi stazje na hospital, e tabata den JCI tur esei pa e tin un bon kuríkulo pa e por partisipá den e proseso di selekshon. I Dagnery a logra drenta medisina.

Kustumbrá na Ulanda

Tirando e bista bèk komo studiante na Ulanda te awor aki Dagnery a splika nos ku e bida tabata di kustumbrá. E ta kompletamente otro. E mester a kustumbrá ku e diferensia di kultura. E ta kòrda riba e dia di introdukshon a bisa nan ku nan ta haña kuminda mèrdia, i el a tene kuenta ku esei pero e kuminda tabata un pan ku un belèg den dje. Esei no ta loke el a kustumbrá na Kòrsou. E ta kòrda un bia un dosente a bisa ora un hende hasi aña nan ta trit. El a kustumbrá ku ora bisa ta trit ta pasapalu i ko’i bebe ta bin kuné pero na Ulanda e ta djis pasa kumpra algun saku di chips, pone mei mei i tur hende hinka man kome. Meskos e mester a kustumbrá ku nan ta puntra bu si bo ke te i ora bo bisa si, despues bo ta haña un ‘tikkie’ pa por paga bo te. I no mester lubidá e wer pasobra ta bira skur lihé i mainta ta skur ainda. I ta friu, awa ta kai hopi. Ora awa kai na Kòrsou bo ta warda e awa pasa pa bo hasi bo kosnan pero na Ulanda tur kos tin di sigui normal ku e awa i sneu. Dia el a eksperensiá sneu promé bia e no a  ferwaktu asina friu i ku ora bo kana bo ta slep. E no tabata asina “glamurous” manera e ta keda pintá, Dagnery a bisa ketu bai ku un sonrisa di legria riba su kara pa su eksperensia na Ulanda.

 

Pensa hopi

Pa loke ta su estudio mes el a bisa Djasabra ku loke e ta gusta hopi ta ku e por yuda hende i pa e motibu ei el a bai hasié Tur dia ora e kaba di papia ku pashènt e ta gusta e reakshon. E gusta tambe e echo ku bo tin di pensa hopi. Tur kos ku e hasi e tin di pensa ku ta e mihó kos i si ta e mihó alternativa. E ta un desafio pe ku no tur ora e tin di sinta tras di un kòmpiuter òf lesa mail pero e tin di keda pensa i esei ta un desafio pe i hasi e trabou ‘leuk’.

Parti di AMA

Meskos ku na Kòrsou el a forma parti di organisashonnan, el a sigui kuné na Ulanda i den e kaso aki el a forma parti di e organisashon AMA ku ta para pa médikonan antiano na Ulanda.

El a kuminsá komo miembro ora e tabata birando médiko i 2 aña pasá a aserk’é pa drenta direktiva i el a hasié pa 2 aña. Promé e tabata atendé ku eventonan di AMA i despues el a bira vise presidente eksterno i tabata enkargá ku papia ku hendenan di Kòrsou, Aruba òf Boneiru pa e ‘netwerk’ di AMA. E organisashon aki a keda lantá na Ulanda pero pa hendenan ku ta médiko i studiante di medisina pero miéntras tantu a ampli’é i otro estudionan relatá na medisina tambe por bira miembro. E ta pa studiante i esnan ku a terminá nan estudio. Bo ta biba na Ulanda pero bo mester a nase na e islanan o a biba un tempu aki. Ta organisá lekturanan, eventonan agradabel pa nan ‘netwerk’ ku otro. Nan ta spera ku ta mas fásil asina pa yunan d tera bai bèk e islanan i si tin mihó komunikashon entre e islanan i esnan ku ta studia na Ulanda. Por ehèmpel CMC por buska kisas kardiólogo etc., etc.. Den nan ‘netwerk’ tin hende den tur spesialismo. AMA ta keda krese i awor aki tin 200 miembro. E no ta super grandi i no tur ta dòkter pero mester ta hendenan den estudionan relatá na medisina.

 

Investigashon respiratorio

Kuido Respiratorio tambe Dagnery algun siman pasá den publisidat. El a splika nos ku el a hasi un stazje nèt den temporada di corona. Tabata un stazje sientífiko. E mester a solisitá un kaminda pa hasié i el a hasié den kuido intensivo pasobra tabata nèt den temporada di corona. Tabata den sèptèmber pa desèmber na 2019 pa 2020. El a haña interesante pa e yuda einan. I el a hasi un investigashon di e pashèntnan ku covid den ‘beademing’. El a hasi investigashon kiko ta pas ku na múskulonan di hala rosea, si e ta impaktá esei negativamente miéntras nan ta na ‘beademing’. Esei a haña atenshon den un publikashon di Intensive Care ku yama Respiratory Care i publiká einan huntu ku e otro dòkternan ku a traha na e investigashon. Tabata su promé publikashon. Or a hasié e grupo investigá no tabata grandi ainda na kuminsamentu di covid. E poder di e estudio no tabata asina grandi pasobra ta solamente 70 pashènt i p’esei no por bisa ku e ‘beademing’ ta malu òf no.

Stazje na Tanzania

I na yüni awor ora e kaba su estudio komo ‘basis arts’ e no ta kla ainda. El a bisa Djasabra ku e ke spesialisá. E no sa ainda den kiko presis. E ta purbando tur kaminda. Por ehèmpel awor e ta hasiendo stazje na ginekologia pasobra e ta hañ’e hopi ‘leuk’. Den mei e ta bai Tanzania na Afrika pa 2 luna pa einan hasi un stazje. E ta otro for di Ulanda i nan no tin kasi nada einan. I einan e lo wak kua banda e ta bai. E sa kiko e gusta i kiko e no gusta ke men e sa kua direkshon e lo tin di bai pa skohe. E ta spera ku despues di Tanzania e tin un bista presis kiko e ta bai pe.

 

Un dia lo bin Kòrsou bèk

Dagnery a bisa ku su focus ta pa bin Kòrsou bèk. Su estudio ta hopi largu pasobra e falta sigur 5 pa 6 aña mas pa spesialisá. Miéntras tantu e ta sigui ‘netwerk’ i traha na Ulanda i studia. Kòrsou ta un isla bunita ku e stima i ke aportá. E ta kere e lo komprondé mas pa e pashèntnan na Kòrsou.

Kòrda bo meta

Den e temporada aki tin studiantenan ta buskando kua direkshon nan bai i unda nan bai studia. Pa esnan ku ta bai sigui studia den eksterior Dagnery a bisa lo siguiente; kuminsá na tempu sino bo no ta logra. I wak pa bo ta sigur kiko bo ta hinka bo kurpa aden. E tambe a hasi e fout di hasi un estudio ku e no gusta i awor e tin algu ku e ta sintié na kas. Kòrda bo meta. Studiante ta bai i dezja pasobra no ta loke nan tabata ke. Pero kòrda bo meta ku ta pa un diploma i tur sobrá kos ta ‘bijzak’. Si e wer ta malu ta bèrdat. No siega pa tur otro kos.  Bo ta independiente i kòrda bo meta. I bai fiesta ta ‘leuk’ pero semper kòrda bo meta.

LAGA UN KOMENTARIO

Please enter your comment!
Please enter your name here