WILLEMSTAD.- Djadumingu último den sala di Adriana Reception room, Dailin Viera, 19 aña, a keda presentá komo e representante ofisial di Kòrsou na e prestigioso sertámen di Reina Hispanoamericana 2018.
E sertámen sigur no ta deskonosí, esaki despues ku na 2011 nos Evalina van Putten a gana e título máksimo i aña pasá, nos aktual Miss Kòrsou, Akisha Albert a logra e posishon di promé finalista.
Dailine Viera a ser aserká pa un organisashon internashonal hopi prestigioso despues ku nan a mira su desaroyo den e último sertámen di Miss Kòrsou i na momento ku e no a resultá den premio nan a hañ’é indiká pa e representá Kòrsou den e sertámen aki na novèmber próksimo.
E bunita representante aki ta ser prepará pa e Team di IBFF bou di guia di Aubrey America huntu ku: Valerie Brown Miss Interncontinental Curaçao 2001, Mariliana Djaoen eksperto di Toast Master, Manuel Davalillo di Gran Melia Salon, William Sanchez di Gym Center, Samuel Pantaleon diseñadó Internashonal, Ilan Zuniga fotógrafo lokal i David Meyer, hóben talento ku tin na su enkargo e trahe nashonal.
Aworakí IBFF ta konsentrando riba e detayenan pa Kòrsou por ta orguyoso di e representashon di Dailin Viera den e sertámen Reina Hispanoameriocana 2018.
