Riba e foto por mira ku nada no a sobra dje niteclub, despues ku e dak a bin abou durante di un konsierto dje popular Rubby Perez.
SANTO DOMINGO.- Outoridatnan dominikano a rekuperá kurpa di 58 persona ku a pèrdè nan bida ora ku dak di un klup di anochi na Sto. Domingo a bin abou durante di un konsierto dje popular kantante Rubby Perez.
Trahadónan di reskate mester a hisa blòkinan, zinknan di dak i baranan di heru dje klup di anochi Jet Set, ubiká den e kapital dominikano. E kantante di 69 aña a keda reskatá na bida i hibá na un hospital.
“Nos lo sigui traha huntu minüt pa minüt”, segun e direktor di Sentro di operashon di Emergensia (COE), Juan Manuel Mendez. Mas ku 370 trahadó di reskate ku 150 ambulans tabata na e sitio.
Kantidat grandi di hende a reuní pafó dje zona di e suseso, komo tambe na hòspitalnan i kasnan mortuario, pa buska notisia di famianan ku tabata den e fiesta.
Segun Iris Pena ku a sali ileso, “na dado momento tabata manera tera ta kai den bibidanan riba mesa. “Na momentu ku nos a bai sinta, un piedra a kai banda di nos mesa”.
“Mi ruman, mi ruman”, Ana Lorenzo tabata bisa yorando. Su ruman, Paulino Lorenzo, ta entre esnan ku a pèrdè nan bida. “E ta konfirmá kaba, nan a yama mi pa bisa ku el a muri”, segun e ruman muhé a sklama.
Te ku ayera tardi no tabatin un balanse ofisial riba e kantidat di persona ku a akudí na e konsierto den Jet Set, ku tin kapasidat pa 700 persona na mesa i 1.000 riba pia.
Perez tabata kanta den un programa yamá “Lunes de Jet Set”, ku tur siman ta presentá bandanan lokal i internashonal.
“Tabata algu ku a sosodé masha lihé”, segun manager dje kantante, Enrique Paulina, kende a sobrebibí. “M’a kere ta un temblor, i p’esei a tira mi mes na suela i tapa mi kabes. “Un di nos saksofonistanan a muri. Nos a purba yega kaminda ku Rubby tabata, pero tabatin demasiado kos den kaminda”, el a bisa,
Entre esnan ku a pèrdè nan bida ta figurá e gobernadó dje provinsia di Monte Cristi, Nelsy Cruz. “El a muri den Plaza de Salud”, un hospital públiko di e kapital, segun e presidente dominikano Louis Abinader, ku a akudí na e zona di desaster.
Gobièrnu Dominicano a dekretá tres dia di luto.
Jet Set a bisa den un komunikado di lo kolaborá “di forma total i transparente” ku outoridatnan pa “trese na kla kiko a pasa”.
***Den oranan di ayera anochi outoridatnan dominikano a anunsiá ku e kantidat di morto a yega 79. Huntu ku e notisia ei a menshoná ku e artista Rubby Perez tambe a fayesé.
Segun e direktor di Sentro di Operashonnan di Emergensia, te den oranan di ayera nochi nan tabata trahando buskando mas víktima.
