Polis: Shofùr tabata bou di influensia di alkohòl
ORANJESTAD.-Polis di Aruba ta informá ku den oranan di mardugá tras di lomba, pa 02:20 am, a drenta notifikashon na sentral di polis ku un aksidente hopi serio a tuma lugá riba kaminda do Bloemond. E promé informashon risibí ta mustra ku un outo lo a alkansá un peaton.
E promé patruya ku a yega na e sitio a topa ku un hende muhé riba kaminda ku no ta duna niun reakshon. Mesora a pidi presensia urgente di ambulans. Na yegada di ambulans e paramédikonan a duna e víktima asistensia, pero lamentablemente no por a hasi nada mas pe. Dr. Voskuil a konstatá morto di Jenifer Jeanely Vrolijk nase na Aruba 28-04-1999, pues di 25 aña.
Na e sitio di e aksidente a detené e shofùr di e vehíkulo Suzuki Vitara ya ku e tabata bou di influensia di alkohòl. Spesialistanan di tráfiko a presentá na e sitio meskos ku funshonarionan di deportamentu forénsiko i Slachtofferhulp. Polis di Aruba ta informá ku e kaso ta bou di investigashon.
