Damita hulandes pushá fo’i baranka tabata tembla i yora inmensamente den korte

WILLEMSTAD.- Korte di promé instansia ayera a trata e kaso lamentabel den kual un damita hulandes di 17 aña a keda sekuestrá, maltratá i tambe a bira víktima di aktonan di inmoralidat den e anochi di 24 pa 25 di ougùstùs aña pasá.
E damita huntu ku su mama i algun familiar ayera a presentá den sala di korte pa enfrentá e pareha akusado Shelomi Plantijn (30) i Azanahil Maduro (34). Tantu e víktima komo su mama tabata sintá basta nèrvioso den sala, promé ku e akusadonan a drenta. Momento ku ámbos akusado a presentá den sala di korte, e mama i e víktima a kai den lágrimanan inmenso.
Ta un kaso ku sigur a sakudí Kòrsou na momento ku el a keda publiká pa promé bes den EXTRA.
Hopi a kere ku e kaso lo tabata unu no bèrdat, mirando e embergadura di e kaso i praktikamente algu asin’aki no a yega pasa na Kòrsou.
E kaso ayera a keda posponé pa motibu ku abogado mr Dickens a distansiá su mes for di e akusado femenino.
E damita ku tabata presente a bai dilanti hues, pa konta su historia.
E tabata tembla di miedu i tabata yora inmensamente. El a asta pidi pa un agente para banda di dje. Su mama tabata pará huntu kuné brasá i bou di lágrima di ámbos e dama a konta lo siguiente:
El a bisa ku pa kuminsá e no tin palabra pa deskribí e loke ku a pasa kuné i kiko te ainda e ta bibando.
E damita a konta ku su dia a kuminsá tempran ora ku for di 10 or di mainta e tabata na su trabou. E tabata hopi entusiasmá e dia ei, pa motibu ku anochi nan tur di trabou lo a bai sali bai Zanzi. Ora el a kaba di traha, el a kore bai kas lihé, kome, baña i drecha su mes super bunita, spesial pa un yònkuman ku tabatin e loko.
E tabatin un anochi super leuk ku su koleganan i ora ku nan a kaba di selebrá nan a regresá su trabou pa asina tur hende por kue nan rumbo pa bai kas.
Segun e damita durante e anochi un kolega i un amigu ku e lo por a pidi pa hib’é kas, a bebe demasiado, p’esei el a bèl dos kolega pa busk’é pa hib’é kas sin problema.
Un di su amiganan si kier a keda i a puntr’é si e ke bai un otro klup kuné pa dal djis algun drinks mas. E amiga a bis’é ku lo bai tin mas amigu di nan ku tambe lo bai. Mirando esaki, el a disidí di keda pa asina bai ku e amiga. Pero despues di a dal dos drinks, echt e tabata kier a bai su kas, pa motibu ku e mester a traha siguiente dia. Ora ku el a insistí ku su amiga pa hib’é kas, esaki a rabia kuné i no a bai akuerdo. Despues di un diskushon, e amiga a disidí tòg di bai hib’é. Den outo a bolbe surgi un diskushon, pa motibu ku e amiga kier a hasi lihé hib’é kas, pa asina e bai ku purá bèk serka su amiganan na e klup.
E damita a sigui konta ku na kaminda e tabata kier a tòg bai ku su skuter ku el a laga un kaminda, pa motibu ku e tin ku bai traha mainta i no kier a yega lat.
Esaki a bolbe trese pleitu entre e i su amiga ku a yega na e desishon pa bah’é fo’i outo.
Segun e damita ora el a baha, el a bisa su amiga ku si e wòrdu violá, esaki lo ta pa su falta. E damita a bisa ku despues di a bisa e palabranan aki, nunka e no por a imaginá su mes ku e palabranan lo a bira mas pió di loke ku el a djis papia.

SHARE

LEAVE A REPLY