Danilo Zabala komo CEO nobo di Blue NAP Americas

WILLEMSTAD.- Blue NAP Americas, kual ta un di e sentronan di data mas avansá den e region di Merka i Merka Latino, sertifiká pa Tier-IV, i ku por akapará un gran kantidat di kliente, a apuntá Danilo Zabala komo e Chief Executive Officer nobo di e kompania. Esaki a drenta na vigor for di 1 di yüni. E kontinuidat pa loke ta trata e rumbo di e kompania tabata e preferensia den e transishon. Pues, en bes di apuntá un persona eksterno kual su maneho lo por tin komo konsekuensia muchu kambio, e Hunta di Komisario di Blue NAP Americas a opta pa promové nan Chief Commercial Officer pa e funshon di CEO, ya ku nan ta rekonosé señor Zabala komo un persona ku gran konosementu di e maneho interno i nan tin e konfiansa ku e lo por sigui guia e kompania riba e rumbo aktual.


For di e momentu ku a apuntá Danilo Zabala den e funshon di CCO na 2016, e tabata e persona kardinal pa loke ta trata atraé un kantidat di e kompanianan mas renombrá na mundu pa Blue NAP Americas. E la fortalesé relashonnan ku institutonan gubernamental i bankonan komersial, ku konsekuentemente awor tambe ta parti di e portfolio di kliente di Blue NAP Americas. E liderazgo ku Danilo a demonstrá den e area di komersio tabata esensial pa por a fortalesé e identidat di Blue NAP Americas komo unu di klase mundial den e merkado di sentro di data.
“Komo e CEO nobo di Blue NAP Americas, mi ke sigurá nos klientenan ku nan lo por sigui konta ku e mesun nivel di servisio i dedikashon firme pa ofresé e standart mas haltu pa loke ta trata teknologia i seguridat pafó di Estados Unidos”, CEO nobo di Blue NAP Americas Danilo Zabala ta indiká. “Ta nos vishon pa bira e puerto prinsipal pa e tráfiko di nètwèrk entre Estados Unidos i Merka Latino, i nos lo logra nos meta dor di kumpli ku e kriterionan internashonal mas haltu ku tin”.

SHARE

LEAVE A REPLY