WILLEMSTAD.- David Dick ta kandidato di partido PAR pa bira Minister di Hustisia den e siguiente Gobièrnu. Asina fuentenan di PAR a bisa EXTRA ayera. Lider di e partido Eugene Rhuggenaath ayera anochi no ke a reakshoná.
Ayera anochi partido PAR a reuní tokante personanan pa bira Minister den e Gabinete nobo pa e partido. David Dick tabata minister di Hustisia pa Antia Ulandes for di aña 2005. Den aña 2001 I 2002 e tabata diputado di Finansa. Otro nòmber ku a keda menshoná pa e posishon tabata di Ornelio ‘Kid’ Martina, ku tabata Minister di Hustisia den Gabinete-Koeiman pa partido PNP. Tambe nòmber di Etienne van der Horst a keda menshoná, Van der Horst tabata Minister di Gobernashon, Planifikashon I Servisio Públiko entre 2012 I 2016 pa partido PAIS. Ayera anochi direktiva di PAR a reuní tokante nòmbernan pa e diferente kartera. Te ainda partido no a duna komentario ofishal tokante e posibel kandidatonan, pasobra tur mester finalisá proseso di screening promé.
PAR tin e siguiente karteranan: Minister di Asuntunan General inkluso Refineria di Kòrsou N.V. (Eugene Rhuggenaath).
Minister di Enseñansa Siensia, Kultura i Deporte (Marilyn Alcalá-Wallé ta e kandidato mas prinsipal pa e posishon ei), Minister di Tráfiko Transporte i Planifikashon Urbano (ku lo bira e kartera pa Zita Jesus-Leito). Partido PAR tambe mag di nombrá un persona pa posishon di Minister di Hustisia.
Partido MAN tin ku nombrá personanan pa Minister di Finansa (ku lo ta Kenneth Gijsbertha), Minister di Asuntunan Ekonómiko i Desaroyo, inkluso Curoil N.V., Integrated Utility Holding N.V. (Aqualectra) i Buskabaai N.V. (Steven Martina), Minister di Desaroyo Sosial, Labor i Bienestar (Hensley Koeiman), Minister di Maneho di Gobernashon, Planifikashon i Servisio Públiko (pa e funshon aki Armin Konket ta e kandidato mas prinsipal).
Partido PIN lo nombrá Suzy Camelia-Römer komo minister di Salubridat Públiko, Medio Ambiente i Naturalesa.
