..Den simannan ku a pasa, Rosette Maduro a lansa e buki De Avonturen van Setta. Rosette ta yu di Kòrsou bibá pa basta aña kaba na Hulanda. I nos a papia ku Sette, kaminda el a konta nos kon bin el a yega na e idea di e buki. E aventuranan di Setta ta hiba nos bèk den pasado, dushi rekuerdo.

Mi propio eksperensianan…

Esaki ta su promé buki. E motibu dikon el a yam’é Setta ta pasobra su nòmber mes ta Rosette Maduro, nan ta yam’é Sette pero tòg el a preferá tene e nòmber di e buki separá di esun di dje. I p’esei e nòmber Setta.  E buki ta relatá aventuranan ku el a eksperensiá tempu e tabata chikí. Historianan di tempu e tabatin for di 8 pa 9 aña i kiko el a eksperensia komo mucha. Sette a bisa ku e semper tabata gusta lesa i e bukinan ku e ta lesa semper ta papia di muchanan di Hulanda, kore baiskel, den sneu, tira bala di sneu i no tin niun punto pa e rekonosé. I p’esei el a disidí di traha un buki, kaminda riba e portada ta mucha brùin, tur loke e tabata hasi manera traha ku lodo, traha bolo di lodo i tur el a hinka den e buki pa asina e muchanan di Kòrsou, muchanan koló skur ta rekonosé nan mes den dje.

 

Impreshon robes di Kòrsou na Hulanda…

Rosette a haña importante pa e skibi un buki asina’ki,  pasobra e kier a rekonosé su mes sigur ku e pintura i eksperensianan i pa otro mucha na Kòrsou i tur kaminda, muchanan koló skur, mester bin mas dilanti. Tur buki ku el a lesa kaminda tin mucha koló skur, tur ta papia di pobresa òf e mucha no tin sapatu etc., etc. Sette no tabata ke e tipo di buki asina. Loke tabata manera e drùpel den e èmber ta un eksposishon ku el a tuma parti na dje na Utrecht. E ekspositor na e okashon aki a pone lus riba Kòrsou pero riba kosnan ménos bunita. Hopi antiano a rabia e momentu ei, pasobra “nos nunka a biba den un kas di kunuku. No ku nos ta hasié ménos pero pone e kos den balansa i esei no tabat’ei. Ami a pidi un periodista na Kòrsou pa saka algun potrèt di Kòrsou. E periodista a saka potrèt di kaya”. E ta kòrda e tempu ei na Hulanda tabata papia hopi di kayanan di Kòrsou i kon e isla ta mustra i p’esei el a saka pòtrèt di kaya, kas manera nan ta biba den dje. Tin hende na Kòrsou tin nan kas ariba ku abou, tin otro den kasnan bunita i no ta asina ku e mester ta un kas di kunuku. Pero mester a pone un balansa pa laga mira nos isla, esei pa Rosette tabata masha importante. E no ta kere mester a pone Kòrsou manera kos ku no tin nada aki, manera aki ta hende bobo, manera ta hende pober tin aki. Rosette a sigui bisa Djasabra ku el a bai Hulanda ku su yunan i despues di hopi tempu e ta bin promé bia ku un di su yunan. I e yu ta bisé ku e ta mira hopi outo poné un kantu, e kier a sa dikon. Esaki pasobra e yunan no a kustumbrá ku Kòrsou e kosnan ta ‘val op’, pero e yunan a mira ku no ta esei ta Kòrsou. Kòrsou tambe ta den balansa mester ku tur otro lugá i esei pa Rosette ta masha importante.


Buki na tur idioma…

Pa loke ta e situashon aktual, e impreshon ku Hulanda tin di Kòrsou, Rosette a splika te ainda e no ta manera e mester ta. E ta un manera mas suptil pero ainda ta pensa na Hulanda ku Kòrsou ta ménos. I p’esei el a skibi e buki, ku ta e promé pero lo bin mas den futuro. Meskos ku segun Rosette e buki ta na hulandes pero e lo bin pronto den ingles, papiamentu i asta na spañó.  Te ainda esun na hulandes ta riba merkado, entre otro na librerianan na Kòrsou. Pa Rosette ta masha importante pa e buki ta na papiamentu pero un djis esei tambe lo ta kla.

 

Bishita di wela…

Den tur e historianan di su eksperensia ku e buki ta kontené, Rosette a bisa Djasabra ku loke el a gusta mas ta esun di su Wela ku ta bin bishita. Ta mama di su tata i ora e ta bai bishitá, siendo un muhé fuerte i tabata traha na plasa i ora e bin di bishita tabata manera un fiesta pa nan. E wela tin kara strèn pero ta papia duru. Tur hende banda di kas sa ku e wela tei. Pa nan tabata un happening ku Mama Eddy ta bin. Nan ta bisti paña bunita pa bishita di wela. E wela ta gusta mata siendo un hende ku a lanta den plantashi.

 

Ban bèk den pasado…

Ora Rosette wak bèk pasado, e lo tabatin gana pa nos a keda biba e tempunan ei. I esei ta su meta ku e buki. Awendia muchanan for di esnan di mas chikí ta sinta ku nan telefòn den man. I tin un historia den e buki kon Setta ta sinta ku su dede den boka ta lesa buki. Su mama ta yam’é pa bai kumpra kos i e no tin ni gana di lanta. Pero mara muchanan por siña hunga mas ku otro. E tabata hunga masha hopi mes. E ta kòrda kon e ta gusta kore baiskel i asta pia bou. E kosnan ei ta importante pa e desaroyo di nos muchanan. Ta bon pa muchanan sa kon interkambiá ku otro. Bisiñanan tabata bai serka otro pa hunga. E ta kòrda un wega ku e tabata hunga ku su bisiña. Tabatin un palu di bisiña na kurá i huntu ku su bisiña nan a kompetí ku otro pa wak ken ta dal mas abeha sin ku e pik’é. E kos a bisa un spèl masha leuk mes i asta ora e punta drenta nan man, nan tabata sigui. E weganan ei ta tene muchanan huntu, e muchanan ta hari i tin un relashon ku otro. I e mayornan sa ku  e muchanan ta hasiendo algu sano. Rosette tabata gusta hunga ku su pòpchinan i traha bolo di lodo. I tur e bolonan tabatin un nòmber. Eseinan ta loke ku e ta sinti falta di dje. I den su opvang na hulanda e tin su reglanan. E ta un hende masha stret. Ta asina el a lanta i mir’é awe, bon.

 

Famia ta importante…

I loke Rosette a pasa na chikí el a purba hinka den su yunan. E parti di famia por ehèmpel, kon importante famia ta el a hinka den su yunan. I e ta mir’é ainda den nan. E yunan ta balorá esaki. Kisas dia e yunan tabata mas yòn nan tabata poko otro pero awor nan ke konosé nan famia. I p’esei durante di su bishita na Kòrsou Rosette  a bin ku 2 di su yu hòmbernan pa bin Kòrsou kuné.

 

Presentá na Kòrsou…

Rosette tabata na Kòrsou pa e presentá e buki. El a bisa ku ta for di 2010 e tabatin un fakansi na Kòrsou. I durante di su estadia el a presentá e buki na diferente instansia manera Biblioteka Nashonal. El a hasi e presentashon pa un grupo di amigu i famia tambe i por haña e buki kumpra ‘online’ tambe. Por kumpr’é na Kòrsou na libreria tambe Amazon por kumpr’é  e-book i asta e buki mes por kumpr’é. E buki ta pa muchanan di 4 pa 12 aña. Pero hende grandi por les’é segun Rosette pasobra e ta hiba bu bèk den bo tempu. E ta kòrda dia a presentá e buki pa promé biaha el a splika ken ta Setta, ta un mucha opservadó i el a puntra tur presente ku kiko nan tabata hunga. E buki ta hiba bu bèk den tempu; dushi rekuerdo sigur! Por tuma kontakto ku Rosette Maduro na [email protected]

LAGA UN KOMENTARIO

Please enter your comment!
Please enter your name here