WILLEMSTAD.- Ounke ku temporada di Karnaval ta tras di lomba, ‘DEN E BEMBE’ ta kompartí e artíkulo aki ku nos lektornan debí ku ta di aploudí e echo ku un skol privá ta duna atenshon na nos grandinan di Habaai.
Durante di dos siman den temporada di Karnaval e alumnonan di ‘De Meander’ a traha ku korant na skol. Pa e muchanan di gruponan 3 i 4 nan a invitá kolega Dick Drayer, konosido periodista ku ta produsí informashon pa ‘het Jeugd Journaal, NOS journaal i Novum’.
Drayer a konta su eksperensia den periodismo i a presentá tambe e benefisio i desbentaha, pero tambe e peliger ku tin biaha ta presentá su mes, manera e orkan na St. Maarten.
Pa e selebrashon di Karnaval e muchanan a tene un parada na Landhuis Habaai. E grandinan ku tin ‘pasa dia’ a presensia e parada i animá e muchanan. E grupo di muchanan a baila i gosa den nan trahe di korant riba ritmo di diferente tumba. E Rei i Reina di ‘De Meander’ a animá e muchanan for di riba un karosa.
Unabes paden e muchanan a interpretá e Himno di Kòrsou pa despues presentá e kantika di skol. Despues di e parti ofisial e selebrashon ku e habitantenan di Habaai a kuminsá. E muchanan a kanta tambe pa un habitante ku riba e dia ei a kumpli 101 aña.
Pa finalisá e selebrashon tabatin un show di moda kaminda e muchanan por a presentá nan trahe traha ku korant. Un tremendo fiesta ku bale la pena un ripitishon, esaki danki na e kolaborashon entre ‘De Meander’ i empleadonan di Habaai. Riba foto nos por apresiá algun imágen durante dje selebrashon.
