NEW YORK (AFP). Un funshonario di Atministrashon pa Kontròl di Droga (DEA) di Merka a rekordá fanátikonan ku ta asistí na e pais pa Mundial di futbòl, ku e droganan ku nan ta bende riba kaya òf via internèt ta potensialmente mortal, ya ku nan sa kontené opiod (remedi pa baha doló hopi fuerte) sintétiko. Merka, ku ta prepará pa ta ko-anfitrion huntu ku Méhiko i Canada di Kopa di Mundu entre 11 di yüni i 19 di yüli, pa mas ku un dékada kaba ta konfrontá un oumento den kantidat di morto debí na sobredósis. Segun datonan di Sentro pa Kontròl i Prevenshon di Enfermedatnan, e tipo di droga aki a oumentá den e pais for di final di dékada di 2010 te alkansá un máksimo di 108.000 morto den 2022. Di esaki, 73.000 tabata relashoná ku opiod sintetisá. “Kasi tur e droganan ku nos ta konfiská awor ta kontené fentanilo”, un opiod sintétiko potente rekonvertí pa uso ilegal, segun Frank Tarentino, sup direktor di operashon di DEA pa nortost di Merka.
Den un entrevista ku AFP, el a agregá ku “29% dje pastianan” analisá ta kontené “un dosis mortal di fentanilo”, un dje sustansianan asosiá na e kousa prinsipal di morto pa sobredósis. Tarentino ta rekomendá públiko pa optené e remedi akí den botikanan, pues, su eventual efektonan kontrario por keda aliviá ku naloxona, un aerosol nasal ku ta fásil pa haña pero ku no ta duna resultado kontra di sustansianan sintétiko no kontrolá.
