WILLEMSTAD.- EXTRA kier a manda palabranan di kondolensia na famia i amigunan di Walter Pablo. Un persona ku nos a sera konosí kuné 4 aña pasá den un entrevista, kaminda el a kompartí ku nos parti di su bida.
Den e edishon di Djasabra di 1 di febrüari 2020 Pablo Walter tantu den korant komo riba nos plataforma digital a bisa ku mester respetá e mucha su ora liber despues di skol. E ta haña ku e mucha ta bai kas ku demasiado tarea di skol, i konsekuentemente e mucha no tin ora pa e por ta su mes, pa e ta mucha.
Walter Pablo a traha en enseñansa for di 1959 te ku 20`8 ora el a haña ku tabata sufisiente. El a kuminsá duna lès for di mucha chikí ku ta skol básiko i a terminá komo rector di Radulphus College.
“Mi a move hopi den enseñansa”, asina Walter Pablo a konta nos ku hopi orguyo di su trayektoria den enseñansa. Walter Pablo a kaba 12 di yüni 1959 komo maestro i a kuminsá traha 15 di yüni na aña ‘59 i a traha te 2018. El a kuminsá na St. Joris College na Sta. Maria; e tempu ei Mulo. E tempu ei tabatin e diferensia entre skol pòrnada i Mulo. Skol pòrnada tabata 7 aña skol básiko i Mulo (onderbouw) 6 aña. E mes ta desendiente di un skol pòrnada, Bonifacia skol pa 7 aña largu i despues a sigui subi. El a kuminsá a traha 7 aña na St. Joris College den e promé klas. Di einan di klas 1 el a bula pa klas haltu pasobra el a bira kabes di skol na Sta. Claraschool na Jandoret. Di einan el a sigui studia hulandes i a bai Hulanda. Einan el a studia 6 aña i 3 luna na Tilburg i a bin Kòrsou bèk na 1979 na luna di desèmber. El a yega bispu di Pasku anochi i a kuminsá traha e promé siman di 1980 na Radulphus College. I einan el a keda te 1997 ora el a baha ku penshun. Banda di esei el a duna lès un periodo kòrtiku den hospital na enfermeronan, el a duna lès na MTS di anochi, el a traha ora el a bin bèk na Radulphus e tabata traha tambe na Avond Lyceum PSC i a traha promé un periodo largu na Fakultat di Bouwkunde na Universidat di Kòrsou, el a traha, mitar aña na Boneiru den klase di eksámen pasobra e dosente a bira malu, el a traha na Akademia Pedagógiko i despues na Universidat kier a kuminsá ku un estudio di anochi pa maestronan i el a yuda traha e kuríkulo na hulandes i duna lès einan. Ora Akademia Pedagógiko a bai over pa Universidat el a bai ku nan, i einan el a keda te na òktober 2018.
Tabatin sierto ekspreshon den e entrevista aki ku a haña hopi atenshon entre otro; ku papiamentu su no ta yega leu i tambe hùiswèrk mester keda traha na skol i no na kas.
I Walter no a hasi solamente un bon trabou den enseñansa pero tambe komo direkshon di Kor. El a dirigí pa hopi aña kor na Suffisant.
Nos a papia un mainta masha agradabel serka Walter, kaminda nos a siña kon e ta pone un bòter di awa di fris na su fèn i e ta manda airu meskos ku èrko. Un hende masha agradabel ku awe ta laga atras un historia bunita ku su famia, amigunan i konosínan por ta orguyoso di dje. Den poko palabra nos tur ta orguyoso di Walter. Walter sosegá na pas.
