Abogadonan salvadoreño Salvador Ríos (d) i Isael Guerrero a keda kontratá pa gobièrnu venezolano ku e petishon pa habri e kanal di komunikashon ku presidente salvadoreño Nayib Bukele pa por solushoná kaso dje 252 migrantenan venezolano den prizòn dje pais.
SAN SALVADOR (AFP).- Abogadonan dje 252 migrantenan venezolano deportá pa gobièrnu norteamerikano di Donald Trump i ku tin ya dos luna será na El Salvador, a denunsiá ku nan klientenan ta víktimanan di “tortura físiko i moral”.
Un bufèt di abogado kontratá pa gobièrnu venezolano a logra bishitá e migrantenan den e mega prizòn kaminda nan ta prezu, pero si ta topa ku un muraya di silensio di parti dje gobièrnu di Nayib Bukele i hustisia di El Salvador.
E bufete Grupo Ortega dia 24 di mart a presentá un rekurso dilanti di Korte Supremo pa terminá ku loke nan a kalifiká komo “detenshon ilegal” di venezolanonan ku a yega e pais dia 16 di mart, pero e tribunal no a duna un veredikto.
“Ta trata nan komo delinkuentenan sin derechi, i a pela nan kabes limpi”, segun e abogado Salvador Rios. E kos ei ta tortura, tortura físiko i tortura moral”, segun el a bisa den entrevista ku AFP.
E abogadonan tambe a entregá komo 11 dia pasá un karta na Bukele, aliado klave di Trump den esaki su polítika kontra di migrantenan, pa pidi outorisashon pa bishitá e venezolanonan i optené un prueba ku nan ta na bida. E mandatario no a kontestá.
E defensa no por a avansá pasobra gobièrnu i korte “ta tene silensio”, Rios a indiká.
“Ta manera bo ta lucha kontra mulinanan di bientu, ta un frustrashon bon kla”, el a ekspresá.
E 252 venezolanonan, komo tambe 36 migrante salvadoreño deportá, ta será den “Centro de Confinamiento del Terrorismo” (Cecot), un prizòn enorme pa e míles di miembronan di gèng konstruí resientemente pa gobièrnu di Bukele. Nan no por komuniká ku ningun hende pafó dje prizòn.
