Defensor di Pueblo ta traha rapòrt riba no kumplimentu ku veredikto di korte

Di parti gobièrnu

WILLEMSTAD.- E ofisina di Defensor di Pueblo a saka un rapòrt e siman aki riba e echo ku gobièrnu no tur biaha ta kumpli ku desishonnan di korte. E rapòrt no ta pa públiko ainda, pero pa fin di e luna aki ku tur probabilidat e lo bira públiko.

Defensor di Pueblo, Keursley Concincion ta splika den e podcast 3’or ku Gino, ku ta un realidat ku tin hopi empleado públiko sintá ku e situashon ku ta bai korte ku gobièrnu i gana, pero gobièrnu na su turno no ta ehekutá e desishon di korte. E reklamonan aki ta yega serka Defensor di Pueblo tambe. Ta p’esei e ofisina di Defensor di Pueblo a publiká un enkuesta ku e empleado públiko por a yena.

For di resultadonan di e enkuesta aki por mira e konsekuensianan pa e empleadonan públiko pasobra gobièrnu no ta kumpli ku sentensianan di korte. “No ta solamente konsekuensianan finansiero, pero tambe konsekuensianan sosial i sikológiko. E konfiansa ku mester tin den demokrasia en general ta sufri”, Concincion ta duna di konosé.

E ta splika mas aleu ku si yega na un situashon ku un di órganonan den e “trias polítika” di Kòrsou ta bisa ku e ta hasi loke e ke, e balansa i kontròl den e sistema demokrátiko aki ta bai pèrdí. “No por t’asina ku gobièrnu ta bisa ku e ta wak si e ta di akuerdo ku un desishon ku korte a tuma. No ta asina demokrasia ta funshoná.”

Segun Concincion por tin diferente motibu ku gobièrnu no a logra ehekutá un desishon di korte, pero e ta mustra alabes ku lei tin sufisiente mekanismo pa bisa dikon a pega, pa komuniká ku e empleado públiko i finalmente hasi lokual korte a bisa ku mester hasi. Den kaso ku no ta di akuerdo ku un desishon di Korte den Promé Instansia, por apelá e veredikto.

“Pero, nunka no mester yega na e situashon ku no ta un outomatismo ku ta ehekutá un desishon di korte. Esaki ta un mester, sino nos demokrasia ta den un situashon hopi kompliká.” P’esei Concincion ta bisa ku ta e podernan den demokrasia tin ku tene otro den balansa. Parlamento mester ta esun ku mester asumí un posishon i disidí si e aktuashon aki ta aseptabel òf laga komo e órgano demokrátiko di mas haltu di pais, i tin ku tuma e trabou hopi na serio.

“Si ripará ku gobièrnu mester di yudansa pasobra kisas no por kumpli ku sierto kosnan, mester papia riba e problemanan i purba solushoná nan, pero semper bai mester tin e rèspèt mutuo pa bini huntu i papia riba e kosnan”, Concincion ta terminá bisando.