RIO DE JANEIRO, AP.- E tasa di deforestashon den Amazonia ta na su nivel di mas haltu den mas di un dékada, segun un rapòrt di e gobièrnu brasilero publiká djaluna.
E nivel di deforestashon entre ougùstùs 2018 i yüli 2019 a yega na 9.762 kilometer kuadrat, un oumento di 30% kompará ku un aña promé i e total di mas haltu desde 2008, segun señalashon di e Instituto Nashonal di Estudio di Espasio di Brasil.
E área di deforestashon ta esun mas haltu registrá desde 2008 i ta riba esun di Puerto Rico.
E estado brasilero di Para ta representá kasi 40% di e kantidat di deforestashon kompleto den periodo di 2018 i 2019, pero rosamentu ilegal di e selva a oumentá notablemente den estado di Roraima i Amazonia, segun informashon di outoridat.
E rapòrt tabata un vershon preliminar i e datonan lo keda konfirmá otro aña.
E preokupashonnan pa ku Amazonia a oumentá na momentu ku e presidente derechista Jair Bolsonaro a okupá e kargo den yanüari. E mandatario kier fleksibilidat den e medidanan ku ta protehá reservanan natural i diferente tereno indígena komo forma pa promové desaroyo ekonómiko.
Algun lider europeo a argumentá ku e kandelanan den Amazona ta rekerí un kontesta global pa e ròl kritiko di ekosistema i redukshon di gas di kas kual ta oumentá kalor mundialmente.
Funshonarionan di Ministerio di Medio Ambiente kier reuní djaweps ku gobernadornan den region di Amazonia pa deliberá diferente forma pa redusí deforestashon.
