Sharineska (Neka) Florencia

Lijken verzorgster (enfermera di defuntu)

Sharineska Florencia ku tur hende konosé komo Neka ta Lijken verzorgster. Esta enfermera di defuntu. I no kere ta sin mas ta yega drecha un defuntu, mester bai un estudio spesial pa esaki. I Neka a konta ‘Djasabra’ ta kon esei a sosodé.

 

El a splika ku for di ora e tabata chikí el a bisa su mama ku e ke drecha defuntu. Su mama a kere ta wega i a bisé no. Pero segun tempu a bai el a sinti ku esaki e ta yamá pe i esaki e ke hasi. Neka nunka promé a yega di drecha defuntu. El a bai skol, kore stazje i drenta e trabou. Neka a kuminsá studia na Ulanda. Tempu el a bin Kòrsou bèk tabatin un kurso i a siña drecha defuntu. El a kore stazje na tur agensia funerario i a keda na El Consolador.

 

No ta kibra nada

Riba kaya por tende yen historia di kon ta drecha un defuntu. Mester kibra su man pa bistié su paña ta un di e historianan. Neka a nenga kategorikamente ku esaki ta e kaso. Na promé lugá ora bin ku e defuntu ta poné den frizer. Un dia promé ku entiero ta saka e defuntu for di frizer i limpia su kurpa i bisti su paña. No ta kibra nada na e defuntu su kurpa. E man i pia ta move normal pa por bistié su paña. I tampoko ta kibra su paña. Ta manera un hende bibu ta bisti su paña. E ta bisti karson djabou, BH, mea etc., etc.

 

Den Neka su trabou no ta solamente drecha defuntu pero e ta buska defuntu tambe kaminda esaki a fayesé. Si ta un persona ku a bira víktima di un krímen, Neka a bisa ku esei tambe tin su trabou. Pero purba hiba e kara bèk na loke e defuntu tabata promé ku el a fayesé, esta si el a haña kap.


Defuntu ta yora?

Defuntu ta yora? Neka personalmente no ta kere ku e defuntu ta yora pero mas bien e defuntu ta soda. Kòrda ku e tabata den frizer i e ta bezig ta difròs i p’esei e awa ta kore kisas for di su wowo. Loke ku Neka no tin splikashon pe ta ora el a yega di mira un defuntu haña Kippevel ora tabata drech’é. Neka no por a komprondé esei i te awe e no por a haña un splikashon pa esei.

 

8 pa 9 ora for di frizer

Ora saka un defuntu for di frizer, e por keda afó sin den frizer promé e kuminsá deskomponé ta dura sigur 8 pa 9 ora. I p’esei un entiero por tuma lugá na kas kaminda no tin èrko. E kas mester ta adekuá pa e defuntu por para einan. Por ehèmpel mester tin lugá di parker vooral pa entieronan ku ta hala hopi hende.

 

“E trabou aki komo mi gust’é asina tantu, loke mi yega hasi, ora mi bai kas a keda aki. Mi ta bai kas ku otro mentalidat. Mi no ta kue kos di trabou bai kas kuné i tampoko kue di kas bin trabou kuné” Neka a enfatisá.

 

Laga e famia hasi su kos

El a bisa ku mester laga e famia hasi loke e tin gana di hasi ku e defuntu den e kaha drumí ei. No lubidá ku ora e kaha dal sera, e hende no ta wak e defuntu  ei mas. I p’esei nan no ta bisa famia pa no mishi, no hasi esaki i esaya ku nan defuntu. E ta yama esei hunga ku sentimentu di hende. Tin biaha famia ta keda mishi mishi i boka òf wowo ta habri pero ta drech’é bèk. E boka ta wòrdu kos’é pero niun hende ta ripará esaki.

 

Mi satisfakshon

Loke ta un satisfakshon pa Neka ta ora e famia bin bèk serka dje i bisé ku nan defuntu a keda manera e ta.

 

Drecha morto ku 16 aña

Ragina Welvaart ta un hobensita di 16 aña ku su pashon ta drecha morto. Inkreibel pero bèrdat. El a kore stazje na El Consolador i a disidí ku e ke bai sigui studia den e direkshon aki. Sea Lijken verzorgster òf mas leu un patólogo.

 

Ragina ta kòrda ku 5 pa 6 aña e tabata wak na televishon hendenan ta blanku bisti ku defuntu. Su mama a dun’é splikashon i e kos ei a keda den su kabes.  I el a keda ku ta esaki e ke hasi. Den VSBO den klas 3 el a skohe pa bai kore stazje na El Consolador. Asina su mama a ripará ku realmente ta esei e ke bai den dje.

 

Ragina ta den su último aña di VSBO. Su intenshon ta pa aki dos pa tres aña e bai Ulanda, kambia su estudio kompleto i bai den loke e ke realmente esta Lijken Verzorgster.

 

Atendiendo ku defuntu ta algu masha dushi pe. “Mi a gusta  e trabou. Delaster kos ta dushi. Vooral e parti di kose boka. Tur esei mi a siña. E ta kose boka di e defuntu pa su boka no habri”.

 

Ragina ta kòrda ku riba su promé dia, e tabata bezig ku un defuntu esaki a saka sleim for di su nanishi. Ta hende morto nan ta i por spera hopi kos. Nan por respu, nan por saka bientu i tur esei ta masha normal.

 

E ta konsiente ku e mester siña hopi di defuntu. E estudio ta siña enfermedatnan ku nan tin di tene kuenta kuné ora di drecha defuntu. E ta gosa di e trabou aki segun Ragina.

 

LAGA UN KOMENTARIO

Please enter your comment!
Please enter your name here