Manera rèspèt mutuo i retraso di veredikto
WILLEMSTAD. – Durante su diskurso na okashon di instalashon di tres wes nobo, Dekano di Orden di Abogado mr. Carine Jänsch ta di opinion ku banda di proseso di tur dia, tin algun punto kritiko ku na nan opinion mester di atenshon. Ta trata di puntonan ku tur aña di nobo ta riba mesa entre di e reunionnan ku sa tin entre di Korte Komun i Orden di Abogado. For di akinan e dekano ta dirigí su mes na e Poder Hudisial, Ministerio Públiko, Abogasia, e Poder Legislativo i tur otro instansia ku ta forma parti di e kadena hudisial. E Dekano no por a mustra riba tur e aspektonan ku mester di atenshon, pero a para ketu na algun di e puntonan problemátiko.
Un di e aspektonan ku e Dekano a dediká atenshon na dje ta e retraso enorme ku tin den verediktonan. E Dekano a splika ku nan komo abogado no sa mas kon nan tin di splika nan kliente riba e partikularidat aki. Na opinion di Dekano e proseso den Hof ta di tal forma ku e prosedura ta bira fatal i tin biaha tin hende tin di warda un aña òf mas riba un desishon di korte (veredikto).
Ku huramentashon di e wesnan nobo, tin e speransa ku lo traha riba e retraso aki, pero e Dekano ta pidi atenshon spesial pa e problemátika aki, pa motibu tur kos ta indiká ku e problema ta pasando pa promé instansia tambe.
Un di e problemanan kompliká ku e Dekano ta kere ku mester traha ariba i yega na solushon ta e aspekto di falta di rèspèt mutuo, esta abogadonan pa wesnan i tambe wesnan pa e abogadonan. E dekano a splika ku e ta haña reklamo di tur dos partido ku ta falta rèspèt pa otro durante prosesonan hudisial. Esaki no ta bon pa e proseso i lo no yuda niun hende, sigur ora e tipo di dikshonnan kue rumbo tenso dilanti esunnan ku ta bin pa buska nan derecho.
Kada ken ta haña rèspèt ora duna rèspèt i esei ta konta pa tur partido i e Dekano ta pidi pa tur partido tene nan mes na e básiko i asina tambe por garantisá un proseso konfiabel. No mester t’asina tampoko ku kada un partido no por ta skèrpi, pero mester mantené e grado di rèspèt mutuo. E dekano ta papia pa kada ken konta te 10 biaha promé i hala rosea trankil promé ku reakshoná di un forma sin resèpt.
Finalmente e Dekano a ekspresá nan deseo pa yega na un solushon pronto i urgente pa introdusí e “Landsverordening” nobo pa Abogasia. For di aña 2012 tin un teksto kla, miéntras ainda ta aplikando e lei di 1959. Punto di salida di e lei nobo pa abogasia ta pa garantisá e interes general, un bon proseso hudisial i derecho pa tur ku ta buska esaki. Sinembargo ainda e lei nobo ta den konsepto no por keda introdusí, pa motibu ku abogadonan mes no ta di akuerdo ku e kontenido. Ketu bai ta trahando riba un teksto ku tur abogado por haña nan mes aden i for di aki e Dekano ta pidi Minister di Hustisia su sosten pa yega na un lei nobo mas pronto posibel.
