PARIS, Fransia (AFP).- Presidente merikano, Donald Trump, a duna di konosé ku iranínan ta dispuesto na sufri pa nan por ta liber, i ku Merka a interseptá komunikashonnan den kua siudadanonan dje pais ta pidi pa sigui bombardiá e pais. “Nan ta dispuesto na sufri pa por tin libertat”, Trump a bisa den un konferensia di prensa ayera.
Mas aleu el a duna di konosé ku “Iran kompletu por keda eliminá den un anochi, i e anochi ei por ta awe (djamars)”, ora ku e ultimatum ku el a duna pa Teheran laga e kanal di Ormuz liber ekspirá.
Despues el a bisa ku Merka tin un plan ku kua por destruí tur brùg i tur planta di koriente di Iran “den kuater ora di tempu”
A usa mas ku 170 avion
Segun Trump, Merka a usa mas ku 170 avion di guera pa reskatá e dos tripulantenan di un avion di kombate ku a keda tumbá djabièrnè den Iran.
Menasa kontra di periodista
Trump a menasá ku kastigu di prizòn pa periodista di un medio di komunikashon ku e no a identifiká, si esaki no duna e identidat di e persona ku a filtra informashon riba un piloto norteamerikano pèrdí den Iran despues ku nan a tumba su avion F-15.
A manda arma pa manifestantenan na Iran
Trump mas aleu a duna di konosé di a manda arma pa manifestantenan den Iran pero a sigurá ku “un sierto grupo” a keda ku e armanan, despues ku djadumingu el a akusá e kurdonan di a hasi esei. “Nos a manda arma, hopi arma, ku mester a bai pa iranínan pa nan bringa kontra di e matonnan” di outoridatnan. “Pero e hendenan pa kua nos a manda e armanan a keda ku esaki” i el a atvertí di ta “hopi rabiá ku sierto grupo di hende” i ku nan lo paga un preis karu.
No ta preokupá pa posibel krímennan di guera
Donald Trump a duna di konosé di “no ta preokupá” pa e posibilidat ku Merka lo kometé krímennan di guera si ataká infastrukturanan sivil, manera plantanan di koriente, di Iran. “Mi no ta preokupá pa esei. E loke ta un krímen di guera ta ora ku permití pa un pais malu, ku lidernan loko, tin armanan nuklear”, segun e presidente merikano.
Edifisio den Líbano ku a keda bombardiá pa forsa aereo israelí, sostené pa Merka.
