Yüni awor
PHILIPSBURG.- Dia promé i 2 di yüni awor promé minister i minister di Finansa di St. Maarten, Luc Mercelina i Marinka Gumbs lo ta na Kòrsou pa hiba deliberashon riba futuro di e union monetario entre e dos paisnan i e Banko Sentral di Kòrsou i St. Maarten (CBCS) kompartí. Esaki promé minister, Gilmar ‘Pik’ Pisas a konfirmá durante e konferensia di prensa na klousura di e bishita di promé minister Hulandes, Rob Jetten den Karibe. Stabilidat finansiero regional i e futuro di e banko sentral kompartí tabata un di e tópikonan di deliberashon durante di Jetten su bishita na Kòrsou i St. Maarten.
Pisas a zona positivo ku paisnan lo yega na un konklushon riba e futuro di e union monetario. Kiko e konklushon aki lo bira ta anunsiá na final di e bishita di e mandatarionan di St. Maarten na komienso di yüni awor. Na final di e reunionnan lo duna informashon na komunidat, el a bisa.
E echo ku Jetten a hiba deliberashon na St. Maarten riba CBCS ta indikashon ku e tin atenshon pa e problemátika den e union monetario entre Kòrsou i St. Maarten i ku esaki ta di importansia p’e. Gobièrnu di Kòrsou a aserká Parlamento den un karta fechá 24 di mart pa riba término kòrtiku yama un reunion di Komishon Sentral di Parlamento pa deliberá riba e direkshon di maneho deseá di CBCS i e konsekuensianan di esaki. Na opinion di gobièrnu ta tempu pa re evaluá e union monetario entre Kòrsou i St. Maarten i eksplorá e posibilidat pa Kòrsou instituí su propio Banko Sentral.
A base di e punto di bista di Parlamento, gobièrnu di Kòrsou lo habri kòmbersashon formal ku gobièrnu di St. Maarten riba futuro di e union monetario. Segun promé minister Gilmar ‘Pik’ Pisas pa algun tempu kaba tin un impase entre Kòrsou i St. Maarten riba nombramentu di miembronan di Hunta di Komisario di CBCS. Pa motibu di e falta di konsenso entre e paisnan, tabata presidente di Korte Komun di Hustisia i no e gobièrnunan ku a nombra un gran kantidat di e komisarionan for di 10 di òktober 2010.
E blokeo struktural aki den formashon di un Hunta di Komisario pa CBCS ku no ta funshoná bon, i e impasenan atministrativo i polítiko ku ta asosiá ku esaki, opviamente ta stroba e funshonamentu efektivo di e Banko Sentral kompartí, Pisas ta indiká. Otro tópikonan ku ta di interes pa Kòrsou tambe i ku Jetten a deliberá riba dje na St. Maarten ta preparashon pa e Konferensia di Reino ku mester tuma lugá na fin di e aña aki. Tambe e promé minister Hulandes a deliberá riba e rapòrt di e komishon di evaluashon riba paketenan di pais i e konseho pa ekstendé esaki ku 2 aña mas ku enfoke riba fortalesé funshonnan gubernamental kardinal manera maneho di rekurso humano, atministrashon fiskal i maneho di finansa públiko.
Mas di e tópikonan ku Jetten a deliberá riba dje na Kòrsou ta resliensia ekonómiko i e impakto ekonómiko debí na e guera na Medio Oriente, i kolaborashon mas estrecho den Reino riba tópikonan manera energia renovabel, edukashon, kuido médiko, i hustisia. Durante su bishita na Kòrsou i St. Maarten Jetten a pone énfasis riba riba e importansia di komunikashon direkto, konfiansa mutuo i mantené un punto di bista pragmátiko ku enfoke riba implementashon i resultadonan ku por midi.
Foto:
E artista lokal Giovanni Abbath a regalá promé minister Hulandes, Rob Jetten na final di su bishita den Karibe, un buki ku portrètnan di Kòrsou.
