NEW YORK, USA (AFP).- E kompania di aviashon norteamerikano Delta Air Lines a anunsiá ku awor dirèkt e ta suspendé su buelonan entre New York i
Tel Aviv te ku fin di aña, meimei dje tenshon kresiente den Medio Oriente.
E kompania aéreo a sigui otronan manera Air France, Lufhansa i Swiss ku tambe a kanselá òf suspendé biahenan pa siudatnan di region di Beirut i Teheran, na momento ku enfrentamentu entre Israel i e grupo islamita Hezbola ta krese na e frontera israelí ku Libanon.
“E buelonan di Delta entre aeropuerto JFK di New York i Tel Aviv ta keda suspendé te 31 di desèmber debí na konflikto den e region”, segun Delta ta bisa den un komunikado.
E klientenan afektá por bolbe reservá nan buelonan te 1 di mart di 2025.
E desishon ei ta nifiká ku e kompania a para tur su buelonan dirèkt entre Merka i Israel pa loke ta trata e aña’ki, segun un bosero a konfirmá
Despues dje anunsio, e wèpsait dje kompania a sigui mustra buelonan entre New York i Tel Aviv te ku ayera tardi na enkargo dje kompania di bandera israelí ElAl, ku kua e tin un akuerdo.
E temor di un guera grandi a surgi despues di eksploshonnan na Libanon di míles di aparato di komunikashon di Hezbola, ku a laga 37 morto i kasi 3.000 herido den dos dia
E grupo pro iraní a akusá Israel pa e insidentenan, pero e pais aki a mantené silensio riba e insidentenan.
